Қарағандылықтар мерекеде мемлекеттік әнұранды орындады
Аймақта Республика күнінде Ту тұғыр алаңында көк туымызды көтеру рәсімі өтті. Салтанатты іс-шараға облыс басшылығы, қоғам қайраткерлері, мемлекеттік мекеме ұйымдары мен қала тұрғындары қатысты.
– Құрметті қарағандылықтар!
Баршаңызды ұлтымыздың елдігін айғақтайтын ұлық мерекемен құттықтаймын!
Жасына, тегіне, ұлтына, басқа да ерекшеліктерге қарамастан Қазақстан Республикасының азаматы болу – зор мәртебе! Мереке қарсаңында өңірімізде өнегелі іс-шаралар лек-легімен жалғасып келеді.
Еліміздің егемендігінің құрметіне көтерілген көк туымыз әрдайым жеңісіміздің жарқын дәлелі болып, қуатты һәм әділетті Қазақстан құру жолында бекем болайық!
Тәуелсіздігіміз баянды, еліміздің ертеңі жарқын болғай, – деді облыс әкімі Ермағанбет Бөлекпаев.
Бүгін республиканың түпкір-түпкірінде көк байрағымыз көкке көтеріліп, салтанатты жиындар жүріп жатыр.
Дәл осы күні, 35 жыл бұрын елдіктің іргесі қаланып, Қазақ КСР Жоғарғы Кеңесінің шешімімен «Қаз КСР-нің мемлекеттік егемендігі туралы» декларация қабылданған болатын.
Сол себепті де, тұғырлы тәуелсіздігіміздің парқын жете түсініп, сәулелі сәттерімізге сызат түсіріп алмайық!
Мереке құтты болсын!
Мағжан ҚҰДАЙБЕРГЕН
“Ortalyq Qazaqstan”
