Қарағандылық спортшылар Бұқарадан жүлдемен оралды

Өзбекстанның Бұқара қаласында қоян-қолтық ұрысынан өткен Әлем чемпионатынан қарағандылықтар жүлдемен оралды. Чемпионатқа әлемнің 34 елінен 300-ден астам спортшы жиналған.

Ел намысын қорғаған төрт қарағандылық спортшы қола жүлдегер атанды. Аталған турнирде қатысушылар бірнеше жас санаты бойынша сынға түсті. 44 келіде өнер көрсеткен Нияз Матай 14-15 жас аралығындағы санатта жүлдегер атанды.

48 келіде Дильназ Кәрібаева 16-17 жас аралығындағы санатта көзге түсті. Ал, 18-23 жас аралығындағы санатта 48 келі салмақта өнер көрсеткен Сағыныш Асылбекова мен 73 келіде сынға түскен Сұлтанәлі Дінқабыл да жүлдесіз қайтпады.

– Спортшылар сәтті өнер көрсетті. Бірақ, одан да жақсы көрсеткіштерге жете алар еді. Менің ойымша, жеңіске жету үшін сәл тәжірибе жетпей қалды. Шеберлік деңгейін арттыру үшін ірі жарыстарға қатысу керек. Өкінішке орай, жастар мен жастар арасында халықаралық жарыстар аз өтеді. Алда жоспарлар көп. Қараша айында Астанада екі маңызды жарыс өтеді. Бұл жыл сайынғы жастар арасындағы әлем чемпионы полиция майоры Руслан Мұқановты еске алуға арналған халықаралық турнир және ересектер арасындағы Әлем Кубогы. Біздің жауынгерлер медальдармен қуантады деп үміттенемін, – дейді Қарағанды облысының қоян-қолтық ұрыстан аға жаттықтырушысы Рахат Ысқақов.

Ербол ЕРБОЛАТ,
Ortalyq.kz