Жаңалықтар
Қарағандылық гвардияшы Белгібай Әділбек Азия чемпионатының күміс жүлдегері атанды
Ұлттық ұланның 5451 әскери бөлімінің әскери қызметшісі ефрейтор Белгібай Әділбек Душанбе қаласында өткен аралас жекпе-жектен Азия чемпионатының (ММА) күміс медалінің иегері атанды.
Құрлықтық біріншілікке 18 елден 200-ге жуық спортшы қатысты. Қазақстан атынан ММА бойынша ұлттық құраманың 37 мүшесі қатысты.
Жартылай финалға шығу үшін 20 қазақстандық жауынгер шайқасты, олардың 13-і жекпе-жекті жеңіспен сәтті аяқтады.
70,3 келіге дейінгі салмақ дәрежесіндегі финалдық жекпе-жекте қазақстандық гвардияшы тәжік спортшысы Масуд Одинаевтан жеңіліп, байрақты бәсекенің екінші сатысына табан тіреді.
Қазақстанның қоржынына жалпы жеті алтын, сегіз күміс және 10 қола медаль түсті.
Жәлел ШАЛҚАР