Қарағандылық Егор Желтов екі дүркін Азия чемпионы атанды

ММА бойынша Қазақстан жасөспірімдер құрамасы Бахрейн корольдігінде өткен құрлық біріншілігіне қатысып, қарағандылық жас спортшы екінші рет Азия чемпионы атанды. Финалдық белдесуде жерлесіміз Тәжікстаннан келген спортшыдан басым түскен.

Осы уақыт ішінде Егор екі дүркін Қазақстан чемпионы, әлем чемпионатының қола жүлдегері, енді екі дүркін Азия чемпионы атанып отыр. Чемпионатқа дайындық Қарағанды облысының ММА федерациясының құрамына кіретін YERMOLAEV TEAM ММА клубында өткен.

– Дайындық екі кезеңде өтті. Жаттығудың бірінші кезеңі спортшының физикалық және функционалдық қасиеттерін дамытуға, ал екіншісі тактикалық дайындыққа бағытталды. Әлі де көп жұмыс істеу керек, – дейді жас спортшының жаттықтырушысы Дмитрий Ермолаев.

Ілияс ДҮНГЕНБАЙҰЛЫ.