Қарағандыдан ТМД-ға дейін

Мемлекет басшысы Қасым-Жомарт Тоқаев «Әділетті Қазақстан: заң мен тәртіп, экономикалық өсім, қоғамдық оптимизм» атты Қазақстан халқына Жолдауында «Жалпы, аймақтардың өсіп-өркендеуіне жол ашатын жаңа өндіріс орындарын барынша дамыту керек. …Біз полипропилен және полиэтилен шығаратын ірі өндірістік жобаларды жүзеге асыра бастадық. Бутадиен, карбамид, терефтал қышқылын өндіруге арналған басқа да болашағы зор жобалар қолға алынып жатыр», – деп отандық өндіріс саласының мән-маңызына ерекше тоқталған еді. Қарағандыдан басталған «JAKKO»-ның жеңісті жолы бүгінде ТМД елдеріне дейін созылып жатыр. Түркиядан бастау алған өндіріс көшіп келіп, Сарыарқаның төсінде тамырын тереңге жайды.

Инженерлік жүйелер нарығындағы көшбасшы

Қарағанды зауытының қақпасы ашылған күннен бері пластикалық құбырлар мен инженерлік жүйелер нарығында жаңа белес орнады. Енді бұл бренд тек өнім шығарушы ғана емес, саланың көшбасшысы ретінде мойындалып отыр. Алдағы уақытта үшінші зауыттың Ақтөбеде ашылуы компанияның кең ауқымды жоспарының бір бөлшегі ғана. «JAKKO» – сапа мен сенімнің, заманауи технология мен отандық өндірістің айқын көрінісі десек, дөп түсетіндейміз. Компания өз тарихын 2002 жылы бастаған. Ол кезде бұл ұйым сумен жабдықтау, жылыту және кәріз жүйелеріне арналған инженерлік шешімдерді ұсынатын шағын сауда компаниясы ретінде құрылды. Жылдар бойғы табанды еңбек пен білікті басқарудың нәтижесінде кәсіпорын өз саласында сенімді серіктес ретінде танылып, нарықтағы орнын нығайта түсті. Бүгінде аталмыш компания жай ғана саудамен айналысатын жөнекей ұйым емес, толыққанды сауда-өндірістік құрылымға айналған алпауыт кәсіпорын. Оның құрамында Қарағанды қаласында орналасқан заманауи технологиялармен жабдықталған жеке өндіріс зауыты жұмыс істейді. Сонымен қатар, Ресейдің Жаңасібір (Новосибирск) қаласында да өндірістік қуаты жоғары тағы бір зауыты бар. Зәузатты зауыттар инженерлік жүйелерге арналған сапалы өнімдерді шығарып, ішкі нарықпен қатар, сыртқы нарыққа да кеңінен жеткізуде. Компанияның қарқынды дамуы мен өндірістік әлеуетінің артуы отандық инженерлік жүйелер саласының дамуына қосқан қомақты үлесінің бір көрінісі. Заманауи стандарттарға сай өнімдер мен клиентке бағытталған ұстаным – кәсіпорынның басты артықшылықтарының бірі.

Түркиядан басталған жол

Инженерлік жүйелер саласындағы танымал брендке айналған «JAKKO» компаниясының табысты тарихы 2007 жылдан бастау алады. Сол жылы Түркияның ірі өнеркәсіп орталықтарының бірі Стамбул қаласында алғашқы зауыт салтанатты түрде ашылып, қысқа уақыт ішінде инженерлік жүйелерге арналған 600-ден астам атаулы полимерлік өнім түрлерін шығара бастаған. Жоғары сапа мен заманауи өндірістік стандарттарға негізделген өркенді өнімдер қысқа мерзімде халықаралық нарықта сұранысқа ие болды. Ал, 2009 жылы компания басшылығы стратегиялық шешім қабылдап, Қазақстанның өндірістік жүрегі саналатын Қарағанды қаласында жаңа зауыт салу туралы байыпты бастама көтерді. «ЖАККО Қарағанды» жауапкершілігі шектеулі серіктестігі құрылып, Түркияда жинақталған тәжірибе мен технологиялар толықтай жергілікті өндіріс үдерісіне бейімделді. Осы айқын қадам компания үшін жаңа кезеңнің бір бастауына айналды.

2016 жылы аталған салада маңызды бетбұрыс жасалып, Түркиядағы негізгі өндірістік қуаттар толығымен Қарағандыға көшірілді. Тағдыршешті шешім компанияның Қазақстандағы өндіріс ауқымын еселеп арттырды. Дәл осы жылы зауыт сыртқы кәріз жүйелеріне арналған гофрленген құбырлар шығаратын заманауи жабдықтармен жабдықталып, өнім номенклатурасы айтарлықтай кеңейді. Жоғары сапалы гофрленген құбырлар ішкі нарыққа ғана емес, көрші елдерге де экспорттала бастады. Компанияның дамуы мұнымен тоқтап қалмады. 2018 жылы Ресей Федерациясының ірі өндірістік және логистикалық орталығы саналатын Жаңасібір қаласында екінші зауыттың іске қосылуы «JAKKO»-ның ТМД кеңістігіндегі орнықты ойыншыға айналғанын айқын әйгіледі. Өркениетті, өндірістік кешен де ең жаңа технологияларға негізделіп, өнім сапасына қойылатын халықаралық талаптарға толықтай сәйкес келеді. Ендігіде «JAKKO» бренді – сапа, сенімділік және үздіксіз даму символына айналған атау. Оның өндірістік базасы мен аймақтық кеңеюі компанияның инженерлік жүйелер саласындағы көшбасшылық позициясын одан әрі нығайтуда.

Сапа – басты басымдық

Өндіріс ошағы жылына 16 000 тоннаға дейін дайын өнім өндіру қуаттылығына ие. Барлық өнім «JAKKO» сауда белгісімен шығарылады және 50 жылға дейінгі ұзақ қызмет ету мерзімімен ерекшеленіп, тұтынушылардың жоғары бағасына ие болып отыр. Компанияның басты мақсаты – нарықта сапалы, сенімді және ұзақ мерзімді өнім ұсыну. Бұған жету үшін зауыт бірқатар стратегиялық бағыттарды ұстанады. Ең алдымен, өндіріс үдерісі толық автоматтандырылған әрі әлемдік стандарттарға сай жабдықталған. Заманауи технологиялармен жарақталған зауыттың техникалық базасы үздіксіз жетілдіріліп отырады, сәйкесінше өнімнің сапасын тұрақты бақылауға мейлінше мүмкіндік береді.

«JAKKO» брендімен шығарылатын барлық өнім жоғары сапа талаптарына жауап береді. Мұндай жоғары деңгейдегі сапаға қол жеткізу үшін компания өз зертханасында сапаны қатаң бақылауды жолға қойған. Арнайы дайындықтан өткен, кәсіби шеберлігі жоғары мамандар өнімнің әр кезеңін мұқият тексеріп, тұтынушыға тек сенімді әрі мінсіз тауардың жеткізілуін қамтамасыз етеді.

Өнімнің беріктігі мен ұзақ мерзімді қызмет етуі тікелей қолданылатын шикізаттың сапасына байланысты. Осыны жақсы түсінген компания өкілдері өнім өндіру үшін тек қана Оңтүстік Корея, Еуропа және Ресейдің жетекші өндірушілерінен жеткізілетін жоғары сапалы шикізатты пайдаланады. Яғни, өнімнің тозуға төзімді, экологиялық қауіпсіз әрі ресурсты үнемдеуші сипаттарына кепіл болады. Әлбетте, нарықтағы сұраныс үнемі өзгеретіні аян. Осыны ескерген компания басшылығы тұтынушылардың тілектерін назарға алып, өнім түрлерін үздіксіз кеңейтіп, жаңартып отырады. Әртүрлі салада қолдануға болатын өнімдер – тұрғын үй құрылысы, өнеркәсіптік нысандар, инфрақұрылым және өзге де бағыттар үшін таптырмас шешім. Қарағанды өндірісінің жетістігі – тек техникалық база мен сапалы шикізат қана емес, компанияның жауапкершілігі, кәсіби ұжымы және болашаққа деген сенімді қадамының нәтижесі. Ұлттық өндірістің өркендеуіне үлес қосып келе жатқан зауыт – Қазақстанның индустриялық әлеуетін айқындайтын нақты мысал.

Респондент пікірі

– «JAKKO» менің кәсіби жолымдағы ең үлкен мектеп, табысты тәжірибе алаңы. Компанияда бірнеше жыл еңбек еттім, сол уақыт аралығында тек маман ретінде өсіп қана қойған жоқпын, нағыз командамен жұмыс істеудің не екенін ұғындым. Компанияның ішкі мәдениеті, өндірістегі тәртіп пен сапаға деген ұстанымы бір мен үшін эталонға айналды. Ең әсерлісі, «JAKKO»-ның әр қызметкеріне деген ерек қарым-қатынасы. Мұнда әр адамның пікірі ескеріледі, жаңашыл идеялар қолдау табады. Біз тек өнім шығарып қана қоймай, оның сапасын, экологиялық қауіпсіздігін, ұзақ мерзімділігін ойладық. Әрбір жаңа жобаның сыртында зерттеу, инженерлер мен технологтардың бірлескен еңбегі жатыр. Қарапайым жұмысшыдан бастап, басқарушы құрамға дейін бір мақсат үшін жұмыс істейтінімізді сезінетінбіз. Ал, компанияның Қарағандыдағы өндірістік базасы – нағыз технологиялық жетістіктің көрінісі. Ол жерде орнатылған автоматты желілер, сапа бақылау зертханасы, кәсіби мамандардың үйлесімді еңбегі – бәрі де өнім сапасын жаңа деңгейге шығарды. Мен оны өз көзіммен көрдім, қолыммен ұстадым, іс жүзінде соған үлес қостым. «JAKKO» – өз өнімін халықаралық деңгейге шығарған санаулы отандық брендтердің бірі. Мұны мақтаныш десек, жарасар. Шынында, мен осы ұжымда жұмыс істегеніме ешқашан өкінбеймін. Қайта, бүгінгі жетістіктерін көріп, өзім де сол тарихтың бір бөлшегі болғанымды мақтанышпен еске аламын. Біздіңше, «JAKKO» – ұлттың өндірістік болашағына сеніммен қарайтын кәсіпорын. Алдағы Ақтөбедегі жаңа зауыт – компанияның тұрақты дамуының тағы бір дәйекті дәлелі. Тегінде өндірістің өсуі емес, жаңа жұмыс орындарының, жаңа мүмкіндік пен жаңа сапаның бастауы болмақ, – дейді компанияның бұрынғы қызметкері, инженер-технолог Жанат Баймурзин.

Уақыт сынынан өткен таңдау

Бәсекелестік күн санап күшейіп келе жатқан нарық жағдайында «JAKKO» компаниясы өз тұтынушыларына өнімді үздіксіз жеткізуді қамтамасыз ететін тиімді логистикалық жүйе қалыптастыра алды. Бұл – компанияның басты артықшылықтарының бірі әрі табысты дамуының кепілі. Мәселен, зауыттың өндірістік алаңында тәулік бойы тоқтаусыз жұмыс жүргізілуімен қатар, қоймада әрдайым 400 тоннаға жуық дайын өнім қоры сақталады. Атаулы қор өндірісте үзіліс болған жағдайда да тұтынушы сұранысын толық қамтамасыз етуге мүмкіндік береді. Сонымен қатар, барлық өнім 10 000 000 теңге көлемінде сақтандырылған. Осылайша компания тарапынан көрсетілетін қосымша кепілдік қана емес, сатып алушының сенімін арттыратын маңызды фактор.

Бүгінде «JAKKO» бренді 1000-нан астам өнім түрін қамтып отыр және оның әрқайсысы зор сұранысқа ие. Компания өз өнімін тек Қазақстан аумағында ғана емес, Ресей, Тәжікстан, Ауғанстан және Қырғызстан елдеріне де табысты экспорттап келеді. Сапалы өнімдердің 1000-нан астамы дилер арқылы сатылуы – брендке деген жоғары сенімнің нақты дәлелі. Әсілі, тек дистрибьюторлармен шектелмей, «JAKKO» компаниясы өзінің бөлшек сауда желісін де сәтті дамытып отыр. Қазіргі уақытта Қазақстан, Қырғызстан және Ресейде орналасқан 39 «Almatherm» инженерлік сантехника дүкені тұтынушыларға сапалы өнімді тікелей өндірушіден сатып алу мүмкіндігін ұсынып отыр. Дүкендерде клиенттерге кәсіби кеңес, техникалық қолдау және сервистік қызмет көрсетіліп, өз кезегінде брендтің абыройын одан әрі арттыра түседі. «JAKKO» компаниясы – сенімді әріптес, сапа мен заманауи технологияның үйлесімі. Логистикадан бастап тұтынушысымен кері байланысқа дейінгі барлық кезең мұқият ойластырылған. Кез келген өнім – тек тауар емес, компанияның жауапкершілігінің, сенімділігінің және дамуға ұмтылуының көрінісі.

Жұмысшы санын және еңбекақы көлемін азайтпау мақсатында ірі компанияларға қолдау жылма жыл көрсетіліп келеді. Бүгінге дейін маңызы жоғары негізгі кәсіпорындардың тізімі түзілгенін Мемлекет басшысы Қасым-Жомарт Тоқаевтың өзі мәлімдеген. Өз кезегінде Атамекен Палатасы министрлікке 1500-ден астам кәсіпорынның тізімін бірген. Оның ішінде барлық сала қамтылған. Ал мемлекеттік қолдау шаралары ретінде несиелер бойынша мемлекеттік кепілдіктерді ұсыну, салық төлеуді кейінге қалдыру, жалпы барлық рұқсат беру құжаттары мен мемлекеттік қызметтерді ұсынуды жеделдету қарастырылған еді. «JAKKO» компаниясы мемлекет тарапынан жүйелі түрде қолдау көріп келеді. Иә, кәсіпорын ұжымы барлық қиындықтарды шешуде үкіметтің жан-жақты көмегін сезінгендігін айтады. Қолдаудың барлық бағыттары бойынша, оның ішінде қаржылай, салықтық және құқықтық қолдау шаралары жүйелі түрде жүзеге асырылады.

Бәсекелессіз өндіріс, бәсі биік өнім

Еліміздегі кәріз жүйесіне қажетті құбыр мен фитинг өндірісінің көшбасшысы саналатын компания бүгінде екі бірдей зауытын толық қуатта жұмыс істетіп отыр. Енді кәсіпорын үшінші зауытын Ақтөбе қаласында ашуға ниетті. Әсілі, өндірістік әлеуеттің артуымен қатар, аймақтық дамуға да елеулі серпін береді. Компанияның бас кеңсесі – Қарағанды қаласында орналасқан. Барлық зауыттар осы орталықтан басқарылып, үйлестіріліп отырады. Өнім ауқымы – 20-дан 400 миллиметрге дейінгі диаметрдегі құбырлар мен фитингтерді қамтиды. Бұл – кәріз жүйелеріне арналған құрылғылардың толық спектрі бір шаңырақтың астында өндіріледі деген сөз. Қазіргі таңда кәсіпорын өнімдері тек Қазақстан нарығында ғана емес, ТМД елдеріне де экспортталып жатыр.

Компания сапа мәселесіне ерекше көңіл бөледі. Осы жайында кәсіпорынның сапаны бақылау бөлімінің басшысы Жақсылық Мусин былай дейді:

– Өнім тек қана атамекенімізде ғана емес, ТМД аумағында да үлкен сұранысқа ие. Республика көлемінде біз бірінші орында тұрмыз. Бізге нақты бәсекелес бар деу қиын. Кез келген кәріз жүйесіне қажетті затты өзіміз өндіре аламыз. Үшінші зауыт іске қосылғанда, өндірістік қуатымыз бұдан да арта түседі. Айтпағымыз, отандық нарық үшін де, экспорттық бағыт үшін де маңызды қадам, – дейді ол.

Компанияның жүйелі жұмысы мен жоғары сапалы өнімдері оны саланың нағыз көшбасшысына айналдырды. Алдағы уақытта жаңа зауыттың іске қосылуы мәртебені одан әрі нығайтпақ. «JAKKO» пластикалық құбыр зауыты Қазақстанда, Қырғызстанда және Ресейде 39 «Almatherm» инженерлік сантехника дүкеніне иелік етеді. Дүкендер сөресінде 6000-нан астам инженерлік сантехника тауарлары сатылады.

Болашаққа бағдарланған бренд

Өндіріс пен сенімділіктің, технология мен табандылықтың түйіскен тұсы – «JAKKO». Абыройлы атау бүгінде жай ғана бренд емес, талай жылғы еңбектің, тәжірибе мен терең пайымның жемісі. Түркияда басталған іргелі істердің Қарағанды даласында тамыр жаюы – тек бір компанияның емес, тұтас елдің индустриялық өрлеуінің бір парағы. Сарыарқаның төсінде сан мыңдаған құбыр мен фитинг өндіріледі десек, сол әрбір бұйымның артында инженердің ізденісі, жұмысшының маңдай тері, басшының батыл шешімі жатқанын ұмытпауымыз керектей. Бұл – ең алдымен, отандық өндіріс үшін мақтаныш. Бұл – Қазақстанның өз күшімен, өз білімімен және өз ресурстарымен жасап жатқан нақты қадамы.

«JAKKO» бүгінгі күнмен ғана өмір сүріп жатқан кәсіпорын емес. Ол – келешекке көз тіккен, технологиялық жаңашылдық пен кәсіби жауапкершілікке негізделген үлкен механизм. Ақтөбедегі үшінші зауыттың ашылуы – тек өндіріс көлемінің артуы емес, елдің экономикалық белсенділігінің жаңа нүктесі. Қарышты қадам – батыс өңірдің дамуымен қатар, бәсекеге қабілетті, экспортқа бағытталған өндіріс құрылымының нығаюы. Жаһандық нарықта орны бар, сапа мен сенімге сүйенген компания ғана ұзақ ғұмырлы болмақ. Осы орайда, «JAKKO» өз жолын айқын таңдады. Ол жол – шынайылық пен шеберлікке, үздіксіз даму мен ұлттың өнеркәсіптік қуатына сүйенген жол. Даңғыл жолда талай белес бар, талай асу күтуде. Бірақ, алда күтіп тұрған сындар да, жеңістер де бұл компанияның темірдей тәртібі мен технологияға негізделген табанды еңбегі алдында тосқауыл бола алмайды. Себебі, «JAKKO» – уақыт сынынан өткен таңдау. Бұл – бүгіні берік, ертеңі елмен бірге өрілетін өндіріс.

Ерқанат КЕҢЕСБЕКҰЛЫ,
«Ortalyq Qazaqstan»