Қарағандыда жас қаламгерлердің алғашқы кітаптары жарық көрді
Жас қаламгерлердің кітабын шығару ісі – игі бастама. Қарағанды облысы мәдениет, архивтер және құжаттама басқармасының қолдауымен қарағандылық жас қаламгерлердің алғашқы кітаптары жарық көрді. Жақында ғана қолға алынған «Жас қаламгер» жобасы осылайша жас әдеби буынның шығармашылығына шырақшы болып отыр.
Игі жобаның ұйымдастырушысы, Қазақстан Жазушылар одағының облыстағы филиал директоры Жанат Жаңқашұлы қаламгер ізбасарларының шығармашылық қуанышына құтты болсын айтты.
– «Жас қаламгер» жобасы аясында бірқатар жұмыстар атқарылып жатыр. Солардың сүбелісі – осы. Кітапқа ену, кітап шығару – тарих беттеріне таңбаланатын дүние. Абай «Өлең – сөздің патшасы», дейді. Ал ақын – соның иесі. Антологияға 14 ақын еніпті. Шабыттары сарқылмасын, шығармашылықтары өркендесін! – деді Жанат Жаңқашұлы.
Кітабы жарық көргендердің бірі – жас прозашы, әрі ұстаз Бекзат Алтынбек. Жас қаламгер «Көкжиек» атты жинағындағы әңгімелеріне қала тіршілігінің бұйығы сәттерін, адамның ішкі әлемін, көзқарасын, дүниетанымын арқау ете отырып, бүгінгі күн мен келешектің мәңгілік құндылығын іздейді.
Ал, жас ақын Таңсәуле Әгенқызының нәзік лиризм мен терең сезімге толы «Бозмұнар» атты өлеңдер жинағы – қазіргі қазақ поэзиясына қосылған жаңа леп, жас буынның сыршыл үні. Ақын жырларында туған жердің табиғаты, ауылға деген аңсар, анаға деген сағыныш пен ғашықтық сезімнің сан алуан күйі нәзік суреттеледі. Автордың өзіндік қолтаңбасы әрбір шумақтан аңғарылып тұрады.
Әдебиеттің болашақ әлемі – бір ғана ақын-жазушымен емес, тұтас буынның үні арқылы қалыптасары айқын. Сол себепті, жоба қолдауымен жарық көрген тағы бір кітап «Жас толқын» деп аталады. Мұнда қарағандылық 14 жас ақынның өлеңдері енген. Қайрат Иманбеков, Ерболат Қуатбек, Ербұлан Мақатай, Нұрдәулет Бақытұлы, Нұрасыл Аманжол, Таңсәуле Әгенқызы, Шұғыла Үсен, Алданыш Олжабай, Санжар Жұмағали, Хуралай Сейт, Райымбек Қойшыбай, Айтолқын Жаңабай, Айдана Жаркеева, Нұрғасыр Изат есімді жас буынның сыршыл лирикалары «Жас толқынға» топтастырылған.
Тұсауы кесілген тағы бір жинақ «Сөз шеберлігіне бастар жол» деп аталады. Бұл кітап – жас ақындар мен жазушыларға арналған тәжірибелік-танымдық құрал. Жас қаламгерлердің шығармашылық қабілетін дамытуға, сөз өрнегін жетілдіруге, көркем ойлау мен тіл мәдениетін қалыптастыруға бағыт-бағдар береді.
Осылайша, жас ақындар сахнаға көтеріліп, жалындап тұрып өлеңдерін оқыды. Жаңа кітаптың тұсаукесер рәсіміне ардагер журналист Әли Тойжігіт, жазушы Сүйіндік Жанысбай, қаламгер-ұстаз Әлімжан Жақан, мәдениет қайраткері Жаролла Ақышев шығып, ізінен ерген іні-қарындастарының су жаңа жинағы оқырманға олжа, рухани азық болсын деп, баталарын берді.
– «Жас қаламгер» жобасы – қарағандылық жас таланттарға берілген ерекше мүмкіндік. Қаламгерлік – тек сөзге ғана емес, ойға, жүрекке де қатысты өнер. Осы жолда жүрген әрбір жас – болашақ әдебиетіміздің тірегі. Бекзат Алтынбектің «Көкжиек» жинағы мен Таңсәуле Әгенқызының «Бозмұнар» өлеңдер жинағы – жас қаламгерлердің шеберлігін, ізденісін, рухани тереңдігін айқын көрсететін туындылар. Мен үшін бұл жоба – жас буынның шығармашылығын шыңдап, оқырманға сапалы әдеби өнім ұсынудың айрықша үлгісі. Және де жас ақындардың дені – менің шәкірттерім, сол үшін де қуанышым қойныма сыймай тұр, – деді Әлімжан Құтжанұлы.
Жас қаламгерлер кітаптарын жинақтаған жазушы Жұпар Жақанның құшағын гүлге толтырып, иығына камзол жауып, құрметтерін көрсетті.
Игі іс-шара әрмен қарай Алаш қайраткері Міржақып Дулатұлының 140 жылдығына орай «Тәуелсіздік – баба арманы, ұрпақ бақыты» тақырыбында ұйымдастырылған мүшәйраның жеңімпаздарын марапаттаумен жалғасты. Мектеп оқушылары арасында өткен жыр бәйгесінде топ жарған талантты балалар марапаттар мен ақшалай сыйлықтарға ие болды. Жеңімпаз ақындар сахнаға көтеріліп, өлеңдерін оқыды.
Мәдениет саласының үздігі Гүлдана Мақшонова мен талантты әнші Еркебұлан Қалидың шырқаған әндері кештің шырайын кіргізді.
Қасымхан БҮРКІТҰЛЫ,
«Ortalyq Qazaqstan»
