Қарағандыда Вера Карпованы еске алуға арналған республикалық турнир басталды
Қарағандыда Қазақстанның Еңбек сіңірген жаттықтырушысы Вера Карпованы еске алуға арналған жеңіл атлетикадан ХХ республикалық турнир басталды. Дәстүрге айналған жарыс биыл 2012 жылы туған ұлдар мен қыздар арасында өтуде. Биылғы турнирге еліміздің түпкір-түпкірінен 92 жас спортшы қатысып, өзара бақ сынауда. Ашылу салтанатына облыстық мәслихат депутаты Ерден Халилин мен Жоғары спорт шеберлігі мектебінің басшысы Темірхан Абылаев қатысып, жарысқа қатысушыларға сәттілік тіледі.
Сонымен қатар, Қазақстанның Еңбек сіңірген жаттықтырушысы, марқұм Вера Карпованың жары Василий Карпов пен Афина Олимпиадасының қола жүлдегері, ұлы Дмитрий Карпов та арнайы келіп, жас спортшыларға жылы лебіздерін білдірді. Салтанатты рәсімнен кейін облыстық дене шынықтыру және спорт басқармасының басшысы Серік Сәпиев арнайы келіп Дмитрий Карповке «Қазақстанның Еңбек сіңірген жаттықтырушысы» төсбелгісін табыстады.
– Жарысқа қатысушыларға сәттілік тілеймін. Әлемдік ареналарда көк туымызды көкке көтеретін спортшыларымыз көп болсын. Әуелі, Василий Борисовичке Алғыс айтамын. Дмитрийдей ұлды тәрбиелеп, чемпион шығарды. Осындай чемпиондарымыз көп болсын. Күні кеше ғана Дмитрийге дәл осы атақ келіп жетті. Сол марапатты көптің алдында өзіне табыстайын. Әрине, сіз мұндай атаққа лайықтысыз, – деді Серік Жұманғалиұлы.
Биылғы сайысқа 49 ұл мен 43 қыз қатысуда. Олар жекелей төртсайыс бағдарламасы бойынша өз шеберліктерін сынамақ. Атап айтсақ, қатысушылар 60 метрге жүгіріп, ұзындыққа және биіктікке секіру кезеңінде бақ таластырады. Сонымен қатар, қыздар 500 метрге, ал, ұлдар 600 метрге кросс жүгіруден жарысады. Екі күнге жоспарланған бұл турнир жас спортшылардың жыл бойғы еңбегін саралап, үздіктерді анықтауға бағытталған.
– Барша қатысушыларға сәттілік тілеймін! Осындай ауқымды турнирлерге қатысып, өз мүмкіндіктеріңізді сынау – үлкен тәжірибе әрі шыңдалудың тамаша жолы. Дәл осындай бәсекелер спортшының төзімділігін арттырып, шеберлігін ұштай түседі. Алдағы уақытта әлемдік деңгейдегі жарыстарда да бүгінгі жинаған тәжірибелеріңіз сіздерге үлкен көмек болары анық. Айта кетейік, В.Карпованы еске алуға арналған бұл турнирге қатысқан спортшылардың көбі кейін халықаралық ареналарда ел намысын қорғап, жүлделі орындардан көрініп жүр. Сондықтан бұл жарыс – жас спортшылар үшін үлкен мектеп, мол мүмкіндік. Еліміздің жастарын спортқа баулып, салауатты өмір салтын насихаттау – өз қолдарыңызда!, – деді Ерден Балтабайұлы.
Сонымен қатар, марқұмның жары Василий Карпов та сөз алып, естелінімен бөлісті.
– Оның асқақ арманы – Олимпиада чемпионын тәрбиелеп шығару еді. Бұл арманы орындалмаса да, Вера Карпова чемпион болуға лайық талай спортшының жолын ашты. Олардың бойына жеңіске деген жігер мен табандылық дарыта білді. Кейіннен өзі де «Қазақстанның Еңбек сіңірген жаттықтырушысы» атағына ие болды. Бірақ бұл қуанышты сәтті көзімен көре алмады. Дегенмен, Вера Карпованың ең үлкен мұрасы – оның шәкірттері мен ізін жалғар жас буын. Сондықтан, жас спортшылар, ұстазыңыздың арманын өздеріңіз жалғаңыздар. Дайындыққа немқұрайлы қарамаңыздар. Үлкен мақсат қойып, халықаралық додаларда ел намысын абыроймен қорғаңыздар, – деді Василий Борисович.
Мақаланың толық нұсқасын газеттің алдағы санынан оқи аласыздар.
Ербол ЕРБОЛАТ
Ortalyq.kz
