Қарағандыда «Salauatty ómir saltyn tańda» жобасы іске асырылуда
Қарағанды Жастар ресурстық орталығы «Қазақстан азаматтары» қоғамдық бірлестігімен бірге Мемлекет Басшысы Қасым-Жомарт Тоқаевтың Қазақстан халқына Жолдауы аясында «Salauatty ómir saltyn tańda» жобасын іске асыруды жалғастыруда. Оның мақсаты жастарды есірткі, темекі және алкогольді тұтыну қаупі туралы хабардар ету ғана емес, сонымен қатар оларды салауатты өмір салтын таңдауға ынталандыру, деп хабарлайды Ortalyq.kz облыс әкімдігінің сайтына сілтеме жасап.
Осылайша, Жастар ресурстық орталығы мен қоғамдық бірлестіктің белсенділері №48 мектеп оқушыларымен кездесу ұйымдастырды. Оқушылар нашақорлықтың, темекі шегудің және алкоголизмнің алдын алу саласындағы жетекші мамандармен сөйлесіп, кеңестер мен ұсыныстар алды.
Гүлмира Отыншина, педагогика және психология магистрі, тәжірибеші психолог, Senim рационалды психология орталығының жетекшісі оқушылардың назарын жаман әдеттердің психоэмоционалды аспектілеріне, сыртқы факторлардың әсеріне және қоршаған орта қысымын жеңу тәсілдеріне аударды. Облыстық наркологиялық диспансердің психикалық денсаулық орталығының маманы Елена Шихатова психоактивті заттарды қолданудың денсаулыққа кері әсері туралы егжей-тегжейлі айтып берді.
Кездесу интерактивті түрде өтті: оқушылар пікірталастарға қатысты, сұрақтар қойды, пікірлерімен бөлісті және сарапшылардан кері байланыс алды. Әр қатысушы өзіне пайдалы нәрсе таба алды.
Сондай-ақ, облыстық наркологиялық диспансердің психикалық денсаулық орталығының психологы Жамина Ұрпатшаеваның Қарағанды жоғары гуманитарлық колледжінің студенттерімен кездесуі өтті.
Salauatty ómir saltyn tańda жобасы Қарағандының көптеген оқу орындарын қамтиды. Ұйымдастырушылар салауатты өмір салтын насихаттауға бағытталған тренингтер, дәрістер, интерактивті кездесулер мен спорттық іс-шаралар өткізуді жоспарлап отыр.
Материалды әзірлеген Ербол ЕРБОЛАТ.
