Қарағандыда мектепке дейінгі роботтехника дамып келеді

2019 жылдан бастап Қарағанды қаласының балабақшаларында оқу бағдарламасына мектепке дейінгі роботтехника ұғымы енгізіле бастады. Осылайша «Балақай» бөбекжайына ойын жабдықтары алынды. Әр құрылғының әдістемелік оқу кешені бірге жүргенімен, оларды оқу іс-әрекеттеріне енгізу кешенді қарастырылмады. Баланың жас ерекшеліктері мен қабілеттері ескеріліп, балабақшаға енгізілген роботтехникалық құралдарды біріктіріп, 2022 жылы «Цифрлық сауаттылық» бағдарламасы жазылды. Соның негізінде біздің бөбекжайда «Мектепке дейінгі роботтехника» курсы ашылған болатын.

«Цифрлық сауаттылық» бағдарламасы «қарапайымнан – күрделіге» принципі бойынша жүргізіледі. Яғни балалар қарапайым құрастырғыштардан роботтарды бағдарламалауға дейін үйренеді. Бұл бағдарлама 1-сыныптан бастап оқытылатын «Цифрлық сауаттылық» (авторлары Ж.Кобдикова, Г.Көпеева) пәніне дайындық болмақ. Бағдарлама мазмұнынан мектепке дейінгі білім мен бастауыш білім беру арасындағы айырмашылық мазмұнды, технологияларды, әдістер сабақтастығын байқауға болады.

Баланың қиялында шек жоқ. Ал роботтехника сол қиялды шынайы дүниеге айналдырудың тамаша мүмкіндігіне айналып отыр. Бөбектер түрлі бөлшектерді біріктіріп, шағын механизмді қозғалтқанда, өзі орындай алған ісіне қуанады. Бұл қуаныш – оның ертеңгі талпынысын арттыратын қуатты күш.
Робот құрастыру, бағыт беру, тапсырма шешу – баланың ойлауын тереңдетіп қана қоймай, өзіне деген сенімін нығайтады.

Робототехника педагог үшін – әдістің жаңашылдығы. Ал бала үшін – қызыққа толы ойын әлемі. LEGO, Bee-Bot, WeDo сияқты құрылғылар арқылы бала технологиямен достасады. Әр қозғалған робот, әр орындалған тапсырма – оның жаңа ашқан жаңалығы іспетті.

Балабақшадағы роботтехника – баланың болашағына салынған жарқын жол. Кішкентай саусақтарымен құрастырған шағын роботтар – ертеңгі үлкен жетістіктердің бастауы. Өйткені, бүгін роботпен ойнаған бала – ертең жаңалық ашатын, әлемді өзгертетін тұлғаға айналуы әбден мүмкін.

Жанна ОСПАНОВА,
«Балақай» бөбекжайының директоры,
Айгерім АБДРАХМАНОВА,
информатика пәнінің мұғалімі
ҚАРАҒАНДЫ