Қарағандыда өкпе ісігіне заманауи әдіспен ота жасалды
№3 көпсалалы аурухананың (онкологиялық диспансер) хирургтары Қарқаралы қаласының 55 жастағы тұрғынына ота жасап, оң жақ өкпенің төменгі бөлігіндегі ісікті алып тастады. Ота ер адамға заманауи бейнежабдықтардың көмегімен, Әлеуметтік медициналық сақтандыру қорының есебінен тегін жасалған.
– Мен қалыпты өмір сүрдім және денсаулығыма шағымданбадым. Бірақ биылғы жылдың сәуір айынан бастап үнемі жөтел, ентігу мазалай бастады, сондықтан тұрғылықты жердегі дәрігерлерге жүгіндім. Олар флюорограмма жасап, өкпе патологиясын анықтап, онкологқа жіберді. Мұнда қосымша тексеруден өтіп, келесі күні ота жасады, – дейді науқас.
Кеуде хирургиясы арқылы бас және мойын ісіктері бөлімінің меңгерушісі Ерғали Шәуенов бұл емнің оңалту кезеңі азырақ болатынын айтады.
– Науқастар көп ұзамай қалыпты өмірге оралады. Мұндай операцияларды жасау кеуде хирургиясы бөліміндегі дәрігерлердің көп жылдық тәжірибесі мен үнемі дайындығы арқасында мүмкін болды, – дейді Ерғали Шәуенов.
– Бүкіл еліміздегі сияқты Қарағанды облысында да онкологиялық ауруларды емдеуге ерекше көңіл бөлінеді. Олардың ішінде өкпе рагы жиі кездеседі. Бұл бүкіл әлемдегі онкологтар мен торакальды хирургтар үшін басты мәселе. Бұл аурудан құтылуға мүмкіндік беретін жалғыз радикалды әдіс – хирургиялық араласу. Қатерлі ісіктерді емдеудің жаңа әдістері табысты нәтижеге жету мүмкіндігін арттырады, – дейді Әлеуметтік медициналық сақтандыру қорының Қарағанды облысы бойынша филиалы өкілдері.
Қатерлі ісік ауруын ерте анықтау үшін медициналық сақтандыру қоры тұрғындарға уақтылы скринингтік тексерулер мен профилактикалық тексерулерден өтуді ұсынады. 2024 жылға Қарағанды облысында ересек тұрғындарды медициналық тексеруге және скринингтік тексеруге Медициналық қордан екі миллиард теңгеден астам қаражат бөлінген.
Ілияс ДҮНГЕНБАЙҰЛЫ.
