Кеше, Қарағандыда кеншілер күніне арналған ауқымды концерт өтті. Концертке 120 мыңнан астам қала тұрғыны мен қонақтар жиналды. Полицияның мәліметінше, шараның қауіпсіздігін қамтамасыз ету мақсатында 1000-нан астам полиция қызметкері және Ұлттық ұланның 300 әскери қызметшісі жұмылдырылды.
Мерекеде бірде-бір құқық бұзушылық тіркелген жоқ. Дегенмен, халық көп шоғырланған орында балалардың адасып қалу жағдайлары тіркелді.
– Барлығы 235 бала концерт кезінде ата-анасынан адасып қалған. Полиция қызметкерлерінің жедел әрі үйлесімді әрекетінің арқасында балалардың барлығы қысқа уақыт ішінде табылып, ата-анасына аман-есен табысталды, – деп хабарлады полиция.
Тәртіп сақшылары концерттің жүргізушілерімен тұрақты байланыс орнатып, табылған балалар жайлы жедел хабар таратып отырды. Сондай-ақ балалардың қауіпсіздігі үшін арнайы автобус бөлініп, онда балалар ата-анасы келгенге дейін бақылауда болды.
Аида РАХЫМҚҰЛОВА
