Қарағандыда халықаралық робототехника фестивалі өтеді
Қарағандыда Халықаралық RoboLand 2025 робототехника фестиваліне қызу дайындық жүріп жатыр. Биыл фестивальге Қазақстанның түрлі облыстарынан, сондай-ақ Болгария, Иран, Ресей, Әзірбайжан, Өзбекстан және Қырғызстаннан барлығы 362 команда, 750-ден астам адам қатысады деп жоспарланып отыр. Сөйтіп Қарағанды тағы да техникалық-шығармашылық, инновация және инженерлік жаңалықтар орталығына айналмақ.
Фестиваль 28-29 наурызда «Жастар» спорт кешенінде сағат 08.30-17.00 аралығында өтпек.
Биыл қатысушылар 23 санат бойынша, атап айтар болсақ «Кегельринг», «Лабиринт», «Квадрокоптерлерді маневрлеу», «Шығармашылық санат» бағыттары бойынша бақ сынайды.
Фестиваль аясында дәстүрлі кездесулер өтеді. Пікірталастардың тақырыбы – «Білім беруді цифрлық трансформациялау: трендтер мен перспективалар» деп аталады. Онда жетекші сарапшылар оқу процесіне цифрлық технологияларды енгізуді талқылайды және STEM-білім беруді дамыту бойынша тәжірибе алмасады.
Фестивальді ұйымдастырушылар – Оқу-ағарту министрлігінің қолдауымен Қарағанды облысының білім басқармасы, Білім беруді дамытудың оқу-әдістемелік орталығы екенін естеріңізге сала кетеміз.
Толығырақ ақпаратты www.roboland.kz сайтынан алуға болады.
Ілияс ДҮНГЕНБАЙҰЛЫ.
