Қарағандыда бокстан жасөспірімдер арасындағы Республикалық турнир өтуде
Қарағанды Е.Бөкетов университетінің 7-ші корпусында Халықаралық дәрежедегі спорт шебері Бектас Әбубәкіров және бокстан жастар арасында Қазақстан чемпионы, КСРО спорт интернаттары арасындағы жарыс жеңімпазы, КСРО спорт шебері Елеусіз Қыдыралинді еске алуға арналған І Республикалық турнирдің жалауы желбіреді.
Аталған турнирге еліміздің 5 өңірінен таңдаулы 15 команда бағын сынамақ. 10 жастан 15 жасқа дейінгі 300-ге жуық боксшы өнер көрсетуде. Ал, турнир төрт күнге жалғасады.
Турнирдің ашылу салтанатына облыстық дене шынықтыру және спорт басқармасының басшысы Темірхан Абылаев, Әлия Молдағұлова атындағы облыстық мамандандырылған олимпиадалық резервтегі мектеп-интернат-колледжінің басшысы, Қазақстан Республикасының еңбек сіңірген жаттықтырушысы Ерден Халилин, Әлем чемпионы, екі дүркін Олимпиада ойындарының күміс жүлдегері Болат Жұмаділов арнайы қатысты. Сонымен қатар, басқа да қадірлі қонақтар жарысқа қатысушыларға жылы лебізін білдірді.
Аида РАХЫМҚҰЛОВА,
ortalyq.kz
