Қарағандыда бокстан Азия чемпионатына іріктеу өтеді

22-28 қыркүйек аралығында Қарағандыда әйелдер боксынан «Ең мықтылар турнирі» өтеді. Бұл туралы Қазақстан бокс федерациясының баспасөз қызметі мәлімдеді.

Аталмыш турнирде үздік шыққандар 2024 жылдың қараша айында Иорданияда өтетін Азия чемпионатына жолдама алады. Спортшылар 48, 50, 52, 54, 57, 60, 63, 66, 70, 75, 81, +81 келі – барлығы 12 салмақ дәрежесі бойынша медальдар жиынтығын сарапқа салады. Турнирдің басты айырмашылығы боксшылар рингке баскиімсіз шықпақ. Бұл өзгеріс әйелдер боксында халықаралық аренада бұдан былай баскиім болмайтынымен байланысты.

Қазақстан бокс федерациясы аталмыш жарысты барынша ашық өткізу үшін тікелей көрсетіліммен қамтамасыз етеді.

Ілияс ДҮНГЕНБАЙҰЛЫ.