Қарағанды университетінде музыкалық аллея пайда болды

Қарағандыда Е.Бөкетов атындағы университет аумағында қызметкерлері мен студенттерінің мұрындық болуымен музыкалық “Күй аллеясы” ашылды. Онда Кетбұға, Тәттімбет Қазанғапұлы, Құрманғазы Сағырбайұлы, Тоқа Шоңманұлы, Ықылас Дүкенұлы, Дайрабай Ерназарұлы, Ахметжан Сармантайұлы, Нұрғиса Тілендиев және басқалардың есімдері және шығармашылығымен байланысты орындықтар орнатылған.

Егер сіз олардың біреуіне отырсаңыз немесе жақындасаңыз, онда автоматты түрде әйгілі күйлердің бірінің үзіндісі ойналады.

– Мұнда әмбебап микроконтроллер ойнату құрылғылары бар 17 орындық орнатылған. Адам орындыққа бір жарым метр қашықтықта жақындағанда, сенсор іске қосылып, музыка ойнай бастайды. Жобаны физика-техникалық факультетінің студенттері орындады. Біздің келесі жоспарымыз 8-ші корпустың жанында өлеңдер аллеясын құру. Онда орындықтар орнатылды, электр қуаты жеткізілді, тек электроника мәселесі қалды, – деді Университеттің ақпараттық технологиялар және телекоммуникация орталығының жетекшісі Владислав Карабасов.

Орындықтарда университеттің веб-сайтына апаратын QR орналасқан. Онда сіз белгілі бір музыкалық орындыққа арналған күйші немесе композитор туралы ақпарат ала аласыз.

– Орындықтар жыл бойы жұмыс істей алады, олар жауын-шашынға және төмен температураға төзімді деп айтуға болады, – деп атап өтті жобаны әзірлеушілердің бірі – физика-техникалық факультетінің 3 курс студенті Азамат Әбікенов.

Аида РАХЫМҚҰЛОВА,

ortalyq.kz