Қарағанды облысының жаңа әкімі өңір активіне таныстырылды
Қарағандыда ҚР ремьер-министрі Әлихан Смайылов пен ҚР Президенті Әкімшілігінің Басшысы Мұрат Нұртілеудің қатысуымен Қарағанды облысының барлық деңгейдегі мәслихаттар депутаттарының жиналысы өтті.
Депутаттардың қарауына өңір әкімі лауазымына екі кандидатура ұсынылды – Аймақов Сержан Жаңабекұлы және Бөлекпаев Ермағанбет Қабдулаұлы. Мемлекет басшысының тиісті хатын Әлихан Смайылов оқыды.
Ашық дауыс беру нәтижелері келесідей қалыптасты: С. Аймақовтың кандидатурасын 40 депутат қолдады, Е. Бөлекпаевқа 138 депутат дауыс берді. Жиналысқа барлығы 178 депутат қатысты.
Өңір активімен кездесуде премьер-министр облыс басшылығы өңірлік экономиканы, инфрақұрылымды, кәсіпкерлікті және әлеуметтік саланы дамыту жөніндегі шараларды іске асыруды жалғастыруға тиіс екенін атап өтті.
Әлихан Смайылов әлеуметтік маңызы бар азық-түлік тауарлары бағасының күрт және негізсіз өсуіне жол бермеуді басты басымдықтардың бірі деп атады.
«Нарықты отандық өндірістің сапалы өнімдерімен қамтамасыз ету бойынша жұмыс жүргізу қажет. Оның кең ассортименті мен жеткілікті болуы бағаның өсуін тежейді. Бұл бағытта әкімдік жұмыс істеуі керек», — деді ол.
Сонымен қатар Премьер-Министр бірқатар өзекті мәселелерге назар аударды. Мәселен, модернизация қарқыны төмен және технологиялық жағдайы нашар «АрселорМиттал Теміртаудағы» жағдай алаңдаушылық туғызады, өнеркәсіптік қауіпсіздікке немқұрайлы қараудың салдарынан өлім-жітім саны артып отыр.
Ол бүгін өндірісте тағы бір қайғылы жағдай орын алып, кәсіпорын қызметкері қаза тапқанын атап өтті.
«Мұның бәрі – компания басшылығының тікелей жауапкершілігі. Осыған байланысты оларға кәсіпорынның ешқандай сын көтермейтін барлық бағыттары бойынша наразылық білдірілді. Қазір Үкімет бұл мәселелерді реттеу бойынша белсенді келіссөздер бастап кетті», — деді Әлихан Смайылов.
Сондай-ақ ол өнеркәсіптік өндірістердің экологиялық жағдайға тигізетін зардабын азайту, «Саран» индустриялық аймағын дамыту, білікті мамандарды даярлау, жалақыны уақытылы төлеу және өндірістегі жазатайым оқиғалардың алдын алу мәселелерін бақылауда ұстау қажеттігін атап өтті.
