Қарағанды облысында жедел ішек инфекциясының 17 жағдайы тіркелді

Қазіргі таңда ет пен сүт өнімдері тез бұзылып, ішек инфекциясының  жиілеуі тез. 2025 жылғы қаңтар-шілде аралығында Қарағанды облысында сальмонеллездің 17 жағдайы тіркелді, соның 6-ы – балалар арасында. Былтыр осы кезеңде 12 жағдай болған. Дәрігерлер мұны өнімді сақтау ережелерінің бұзылуы және өнімнің ыстықта тез бұзылуымен байланыстырады. 

–Осыған орай биыл дүкендер мен базарлардан 122 үлгі алынып, зертханалық сараптама жасалған. Оның 107-сі – шұжық өнімдері. Нәтижесінде 3 үлгіде (2,4%) таңбалауға қатысты бұзушылық анықталды: мемлекеттік тілдегі ақпарат орыс тіліндегі мәтінмен сәйкес келмеген. Бір қарағанда «ұсақ қате» көрінгенімен, таңбалаудың дұрыс болуы – тұтынушының құқықтары мен қауіпсіздігінің кепілі. жұқпалы ішек ауруы. Аурудың қоздырғышы — сальмонелла туысына жататын таяқшалы бактериялар. Солардың кесірінен дене  қызуының көтеріліп, жүрек айну-құсу, іштің ауыруы, қан шырыш аралас диарея болуы мүмкін. Әсіресе балалар, қарттар, иммунитеті әлсірегендер үшін қауіпті. Өз бетінше емделмей, міндетті түрде дәрігерге жүгіну керек, – деп атап өтті Қарағанды облысының санитариялық-эпидемиологиялық бақылау департаменті басшысының орынбасары Айгерім Жылқыбаева.

Етті дұрыс таңдау – қауіпсіздіктің алғашқы қадамы:

• Әрқашан қаптаманы оқыңыз: жарамдылық мерзімі, сақтау шарты, құрамы нақты жазылуы тиіс.
• Сапалы өнімде бөтен, қышқыл немесе көгерген иіс болмайды.
• Қаптама бүтін болуы керек. Суланған немесе жыртылған қаптама – ластану қаупін арттырады.
• Етті тек ресми дүкендерден, ветеринарлық құжаты бар орындардан сатып алыңыз.

Сальмонеллездің алдын алу үшін әркім қарапайым гигиена мен ас әзірлеу ережелерін сақтауы тиіс:

• Қолды жуу. Тамақ әзірлеу алдында және кейін міндетті.
• Айырым тақтай мен пышақ. Шикі ет пен дайын тағамға бөлек құрал қолданыңыз.
• Толық пісіру. Еттің ішкі температурасы кемінде 74°C болуы тиіс.
• Жұмыртқаны шикідей ішпеңіз. Тек қайнатылған/қуырылған түрде пайдаланыңыз.
• Бөлме температурасында қалдырмаңыз. Дайын тағамды тез арада тоңазытқышқа қойыңыз.
• Таза су қолданыңыз. Табиғат аясында – термосөмке, бір реттік ыдыс.

Ет өнімдері – құнарлы әрі пайдалы азық. Бірақ қауіпсіздік талаптарын қатаң ұстану – әрқайсымыздың жауапкершілігіміз. Дұрыс таңдасақ сүйікті тағамдарымыз тек қуаныш сыйлайды.  

Жамал АКПАРОВА