Бас тақырыпБасты тақырып
Қарағанды облысындағы 10 шахтадан соңғы 7 айда 21,6 млн тонна көмір өндірілген
Көмір өнеркәсібі бүгінде облыс экономикасының 2,8%-ын, ал жалпы өндіріс көлемінің 6,4%-ын құрайды. Өңіріміздегі 10 шахтадан соңғы 7 айда 21,6 млн тонна көмір өндірілген, оның 4,5 млн тоннасы Ресей, Қырғызстан, Беларусь, Өзбекстан сынды алыс-жақын шет елдерге экспортталады. Бұл жайлы облыс әкімінің орынбасары Әлібек Әлденей әлеуметтік желідегі парақшасында атап өтті.
–Құйқалы өңір жер астындағы мол қазынасымен де танымал. Көмір өнеркәсібі бүгінде облыс экономикасының 2,8%-ын, ал жалпы өндіріс көлемінің 6,4%-ын құрайды. Өңіріміздегі 10 шахтадан соңғы 7 айда 21,6 млн тонна көмір өндірілген, оның 4,5 млн тоннасы Ресей, Қырғызстан, Беларусь, Өзбекстан сынды алыс-жақын шет елдерге экспортталады. Жалпы, көмір өндіруде облыста тұрақты оң динамика байқалады. Былтыр 20,4 млн тонна өндірілсе, биыл ол көрсеткіш 5,8%-ға артты. Бұл қайласы қайыспас қара нарларымыздың жемісі!, – деді Әлібек Әлденей.
Облыс әкімінің орынбасары Қарағанды өлкесі Қарағанды десе, Алаш алыптары Әлихан Бөкейхан, Әлімхан Ермеков, әйгілі әнші-күйшілер Күләш Байсейітова, Мағауия Хамзин, екінші дүниежүзілік соғыстың қаһарман батырлары Қазбек Нұржанов пен Нұркен Әбдіровтер бірден ойға оралатынын тілге тиек етті.
–Құрметті кеншілер! Сіздер жанқиярлық ерлікті талап ететін күрделі де қауіпті мамандықты игеріп, ел игілігі үшін тынымсыз еңбек етіп келесіздер. Өрістеудің өзегі – өздеріңіз. Ел экономикасының еңсесін тіктеп, халықтың әл-ауқатын арттыру жолында қажымас қайрат, мұқалмас жігер, баянды бақыт тілеймін!Өндірістеріңіз өрісті, өмірлеріңіз жемісті болсын! Осындайда киелі өлкеміздің өр рухты ақыны Саттар Ерубаевтың: «Отанымның от азығын жер астында сайлаймын, Мен қайламды, қайратымды тас көмірге қайраймын, Қайраған сайын қайлам өтер, қайратым да тасиды. Маған тас та, жер де, су да тәжім қылып бас иді», – деген жыр шумағы есіме түседі, – деді облыс әкімінің орынбасары.
Айта кеткен жөн, айтулы күнге орай облыста 40-қа жуық түрлі форматтағы іс-шаралар ұйымдастырылды. «Qarmet» компаниясы мен жергілікті атқарушы органдар бірлесіп, Қарағандыда 120 мыңға жуық адам тамашалаған ауқымды концерттік бағдарлама ұйымдастырды.
Бүгін Шахтинск, Абай және Саран қалаларында мерекелік шаралар жалғасуда. Шара аясында көрермен қауым әртістердің өнерін тамашалап қана қоймай, жеті қат жер астынан қара алтын өндіретін кеншілеріміздің мемлекеттік наградалармен марапатталған сәтінің куәсі болады.
Аяулым СОВЕТ
