Қарағанды облысында тұрғындарға қайтадан бетперде тағу ұсынылады
Аймақта 1 ақпан мен 9 ақпан аралығында COVID-19 инфекциясының 12 жаңа жағдайы тіркелді. Бұл туралы санитарлық-эпидемиологиялық бақылау департаменті мәлімдеді.
Облыстық санитарлық-эпидемиологиялық бақылау департаменті Қарағанды облысы коронавирустың таралу көрсеткіші бойынша «жасыл» аймақта, сондықтан ешқандай шектеулер қажет емес деп хабарлайды. Бұл ретте басқарма басшысы, облыстың бас санитарлық дәрігері Юрий Залыгин Қазақстан Республикасының Бас мемлекеттік санитарлық дәрігері Айжан Есмағамбетованың қаулысында бетперде кию талаптары көрсетілгенін атап өтті. Ал бұл талаптар тек Алматы мен Астанаға ғана емес, еліміздің басқа аймақтарына да қатысты.
– Қызылша, COVID-19, тұмау және басқа да жіті респираторлық вирустық инфекциялар сияқты жұқпалы аурулардың таралуының алдын алу мақсатында ҚР Бас мемлекеттік санитарлық дәрігерінің 8 ақпандағы қаулысында бетперде қолдану бойынша ұсыныстар бар. Бұл адам көп жиналатын орындарда: әуежайларда, теміржол және автовокзалдарда, базарларда, сауда және ойын-сауық орталықтарында және сауда үйлерінде, театрлар мен кинотеатрларда, халыққа қызмет көрсету орталықтарында және банктерде болған кезде қажет. Көліктің барлық түрлерінде – қоғамдық, әуе және теміржол көлігінде бетперде кию маңызды, – деп түсіндірді Юрий Залыгин.
Ілияс ДҮНГЕНБАЙҰЛЫ.
