Қарағанды облысында әлеуметтік тауарлардың бағасы 9 пайызға қымбаттаған

Қарағанды облысында жыл басынан пияз, сәбіз, қырыққабат, картоп, қарақұмық жармасы, сиыр еті, май, қант, сүт өнімдері және құс еті қымбаттаған. Осылайша жыл басынан бері әлеуметтік маңызы бар тауарлардағы баға өсімі 9,9 пайызды көрсетті. Өңіріміз баға өсімі бойынша елімізде үшінші орынға жайғасып, алаңдаушылық тудырып отыр. Бағаның қымбаттауына 14 түрлі өнім себеп болған.

Олардың қатарында күнделікті тұтынатын өнімдер – пияз, сәбіз, қырыққабат секілді жоғарыда атап өткен өнімдер бар. Сауда және интеграция министрлігі бұл мәселені шешу үшін тұрақтандыру қорларының жұмысын, өндірушілер мен сауда желілерінің арасындағы келісімдерді қадағалауды күшейтуде.

– Біздің басты міндетіміз – азықтүлік тауарларының қолжетімділігін қамтамасыз ету. Әрбір отбасыға күнделікті тұтынатын өнімдердің бағасы тұрақты әрі қолайлы болуы тиіс. Бағаның өсуін тежемейінше халықтың әлеуметтік жағдайына оң ықпал ету мүмкін емес, – деді Сауда және интеграция министрі Арман Шаққалиев Қарағанды облысына сапары барысында.

Бұл бағытта өңірде кешенді жоспарлар іске асырылып келеді. Әкімдікпен қатар, кәсіпкерлер мен министрлік өкілдері бірлесіп, сауда желілеріндегі бағаға мониторинг жүргізеді. Логистикадан бастап, өнімді сақтау жүйесіне дейінгі тетіктер реттеледі.

Мағжан ҚҰДАЙБЕРГЕН

«Ortalyq Qazaqstan»