«Қарағанды – Балқаш» тасжолын бақылау үшін дрондар қолданылады

«Қарағанды – Балқаш» тасжолындағы қауіпсіздікті дрондар қадағалайтын болады. Бұл туралы Қарағанды облысының полиция департаменті хабарлады.

Патрульдік полицейлер ұшу құралдарын келесі аптадан бастап пайдалана бастайды. Қазір трасса бойында жүргізушілерді дрондармен патрульдеу туралы ақпараттандыратын арнайы белгілер орнатылуда.

– Дрондар полиция басқармасының балансында бұрыннан бар құрылғылар. Олардың көмегімен патрульдеушілер тәртіп бұзушыларды анықтай алады. Мысалы, қарсы жолаққа шыққандар, рұқсат етілмеген жерге бұрылғандар, жолда жүру кезінде басымдық қағидаларын сақтамайтындар және т. б. Тәртіп бұзушылық анықталғаннан кейін жүргізушіні патруль тоқтатып, түсіндіру жұмыстарын жүргізеді, – дейді Қарағанды облысы ПД баспасөз хатшысы Бақытжан Құдияров.

Қарағанды облысы ІІД патрульдік полиция батальонының командирі Медет Нұрмұханов атап өткендей, ұшқыш аппараттарды пайдаланудың негізгі мақсаты барынша көп айыппұл төлеу емес. Жүргізушілерді ЖҚЕ сақтауға ынталандыру және апаттар санын азайту үшін инновациялық техниканы қолдану туралы шешім қабылданды.

Жолдарды дәстүрлі патрульдеу де қалыпты режимде жалғасады.

Материалды әзірлеген Аида РАХЫМҚҰЛОВА