«Қарағанды-Балқаш»: автобанның 94 шақырымы ашылды

«Қарағанды-Балқаш» бағытындағы төрт жолақты автобанның участкелері кезең-кезеңмен пайдалануға берілуде. Бұл жолы Ақсу-Аюлы кентінен бастап Ақшатау кентіне дейінгі ұзындығы 94 шақырым болатын учаскесінде қозғалыс ашылды. Жалпы, қазіргі таңда автомобиль жолының 260 шақырымында қозғалыс ашық.

«ҚазАвтоЖол ҰК» АҚ облыстық филиалының берген хабарламасында:

– Республикалық маңызы бар «Алматы-Екатеринбург» автомобиль жолының учаскесінде (1492,4-1855 км, «Қарағанды-Балқаш» тас жолы) төрт жолақ бойынша қозғалыс кезең-кезеңімен іске қосылуда. Жол қозғалысы қауіпсіздігін қамтамасыз ету мақсатында жылдамдық режимі және жол-құрылыс жұмыстарының жүргізілуі туралы тосқауыл қоршаулар мен уақытша жол белгілері орнатылды, – делінген.

Сонымен қатар, автокөлік жүргізушілерінен жол ережелерін қатаң сақтауды, жол белгілеріне назар аударып, жөндеу жұмыстары жүргізіліп жатқан учаскелерде жылдамдықты асырмауды сақтауды сұрайды.

Ербол ЕРБОЛАТ,
Ortalyq.kz