Білім

Қарқаралыдан шыққан жас өнертапқыштың алғашқы жетістігі

Жас өнертапқыштар тек қалада ғана емес, ауыл-аймақтарда да көп. Соның бірі – Қарқаралы қаласындағы академик Орынбек Жәутіков атындағы №1 жалпы білім беретін мектебінің 9-сынып оқушысы Заңғар Қанатбекұлы. Ол күні кеше өткен «Ұлы өнертапқыштыққа алғашқы қадам» атты инновациялық идеялар байқауының облыстық кезеңінде ауыл шаруашылық техникалар мен жабдықтар саласының техника құрастыру номинациясында І орын алып, өз таланты мен талабын, шығармашылық қабілетін танытты.

Суреттер автордан

Жас өнертапқыш жобаға «Қарапа­йым экскаватордың жұмысы» атты жоба ұсынды. Өз жұмысында Заңғар күнделікті тұрмыста қолдануға болатын шағын экскаватор моделін құрастырып, оның құрылымы мен жұмыс істеу жү­йесін түсіндірді. Негізгі мақсат – экскаватордың қарапайым механизмдер арқылы қалай жұмыс істейтінін және оның тұрмыстағы, ауыл шаруашылығындағы тиімділігін көрсету болды.

Жетекшісі болғандықтан, оқушыға бағыт-бағдар беру – басты міндет. Біз жобаны жасау барысында картон, қатты қағаз, ағаш таяқшалар, шприцтер, жұқа түтікшелер, пластмас хомуттар сынды қолжетімді материалдарды пайдаландық. Гидравликалық принципке негізделген бұл модель экскаватордың негізгі қозғалысын дәлме-дәл қайталай алады.

Экскаватор машинасы қай заманда да өзекті. Ол құрылыс, жүк көтеру, пайдалы қазбаларды қазу, ауыл шар­уашылық және ландшафтық жұмыстарда кеңінен қолданылатыны белгілі.

Қазылар алқасы оқушының техникалық сауаттылығын, қол еңбегімен жасалған экскаватор моделінің қызметін және идеяның өзектілігін жоғары бағалады.

Мектеп ұжымы Заңғардың бұл жеңісін еңбекқорлық пен табандылықтың нәтижесі деп біледі. Ойлау қабілеті жоғары, білімді, жаңалық ашуға құштар Заңғардың болашағынан мол үміт күтеміз. Біз оның техникаға деген қызығушылығы мен шығармашылық қабілеті әлі талай зау биікке жетелейтініне сенімдіміз.

Күлия КЕНЖЕБАЕВА,
Орынбек Жәутіков атындағы №1 ЖББ мектебінің физика пәні мұғалімі
Қарқаралы ауданы

Басқа материалдар

Back to top button