Қарқаралы ауданы Талды ауылында Қасиетті Рамазан айы мен «Алғыс айту» күніне орай жабағы жарысы өтті. Оған көрші ауылдардан 16 шабандоз қатысып, өзара жүйрікті анықтады.
Жарыс ауыл балаларының ұлттық құндылықты насихаттауға және атқа мінуге қызығушылығын арттыру мақсатында ұйымдастырылған. Таза қанды және жабы тайлар жеке-жеке бөлініп, 1,8 шақырымды бағындырды.
Жарыс қорытындысы бойынша таза қанды тайлар бәйгесінде Қасым ауылынан келген «Айқабақ» (иесі Шыңғыс) мәре сызығын бірінші болып кесті. Ал, Аппаз ауылынан келген қос тай, яғни, «Алдиархан» (иесі Асылхан) – ІІ орын, «Нұртөбел» (иесі Нұрали) – ІІІ орын иеленді.
Жабы тайлар арасында өткен бәсекеде Нұркен ауылынан келген «Күміс қасқа» (иесі Жанғазы) қамшы салдырмады. ІІ орынды Қасым ауылынан Бесқасқа (иесі Мансұр), ІІІ орынды Нұркеннен келген Мұзбалақ (иесі Қуандық) еншіледі.
Жеңімпаздар мен жүлдегерлерге ақшалай сыйлықтар, жүген, ертоқым сынды ат әбзелдері сыйға берілді.
Аида РАХЫМҚҰЛОВА,
Ortalyq.kz
