Апта үздігі – Баженов

Қарағандылық «Сарыарқа» хоккей клубының шабуылшысы Никита Баженовтың «Торпедо» клубына соққан шайбасы өткен аптаның «Үздік голы» болып танылды.

«Pro hokei ligasy» сайты апта сайын «Үздік гол», «Үздік пас», «Үздік сейв» және «Үздік тәсіл» аталымы бойынша әлеуметтік желіде жанкүйерлермен бірге үздіктерді анықтайды. Бұл жолы үздіктер қатарында Никита үздік голдың авторы атанды.

Естеріңізге сала кетейік, қарағандылықтар сырт алаңда «Торпедомен» өткен екі ойынның біріншісінде 5:0 есебімен жеңілсе, қарымта кездесуде 2:4 есебімен жеңген болатын.

Никита екінші кездесудің бірінші айналымында гол салып, таразы басын теңестіреді. Қарағандылық клубтың шабуылшысы Сайко Владислав шабуыл барысында ұрымтал тұсты пайдаланып, қақпаға алыстан соққы жасайды. Алайда, қарсылас қақпашысы жойқын соққыны қайтарғанымен, шайба кері қайтып, Пальмтаг Константиннің алдына түседі. Десе де ол өз мүмкіндігін пайдаланып қайта соққы жасағанымен, қақпадан саңылау таппады. Шайба қайта қақпашыға тиіп кері қайтады. Осы тұста оң қапталдан келген Никита қақпадан саңылау тауып, шайбаны ашық тұрған оң бұрышқа еш қиындықсыз тоғытады.

Осылайша, хоккей жанкүйерлерінің қолдауымен қарағандылық клубтың шабуылшысы аптаның «Үздік гол» авторы атанады.

Ербол ЕРБОЛАТ,
Ortalyq.kz