Ғалым Жарылғаповты еске түсіруге арналған халықаралық турнир өтеді
Қарағандыда Серік Сәпиев атындағы бокс орталығында Қазақ КСР-нің еңбек сіңірген жаттықтырушысы Ғалым Жарылғаповты еске түсіруге арналған ХХХІХ халықаралық турнир өтеді. 17-21 желтоқсан аралығында өтеді деп жоспарланған біріншілікке Қазақстан, Куба, Марокко, Ресей, Түркия, Ирак және Өзбекстан мемлекеттерінің мықты боксшылары қатыспақ.
Қарағанды облысының дене шынықтыру және спорт басқармасының мәліметінше турнир тосынсыйларға толы болмақ. Байрақты бәсекенің ашылу салтанатына әлемдік деңгейдегі атақты спортшылар қатысады деп күтілуде. Турнирге 2020 жылғы Олимпиада чемпионы, екі дүркін әлем чемпионы және Еуропа ойындарының чемпионы, түркиялық атақты боксшы Бусеназ Сурменели мен куба қабыландарының қатысуы – жарыстың басты оқиғаларының бірі болатыны сөзсіз.
Қазақстандық және шетелдік былғары қолғап шеберлерінің тартысты жекпе-жектерін көргілеріңіз келсе 17 желтоқсан күні сағат 15.00-де Серік Сәпиев атындағы бокс орталығын бетке алыңыз, мәртебелі оқырман.
Турнир туралы толық ақпаратты газетіміздің алдағы сандарынан оқи аласыздар.
Ілияс ДҮНГЕНБАЙҰЛЫ.
