Аймақ полицейлеріне 200 қызметтік көлік берілді
Аймақ басшысы Қарағанды облысының полицейлеріне жаңа қызметтік автокөліктердің кілтін тапсырды. Құқық қорғау саласы қызметкерлерінің автопаркі облыстық бюджет есебінен сатып алынған 200 отандық арнайы көлікпен толықты.
Олардың басым бөлігі патрульдік полицияға беріледі. Трассада қызмет ететін тәртіп сақшылары да жол талғамайтын көліктер алды.
– Сіздердің қызметтеріңіз жедел және жайлы болуы үшін қолымыздан келгеннің бәрін жасауға дайынбыз. Сондықтан құқық қорғау органдарының тиімді жұмысында материалдық-техникалық базаны нығайту ерекше маңызды. Биыл құқық қорғау органдарының қажеттіліктеріне облыстық бюджеттен 22,8 млрд теңге бөлінді, оның ішінде бір миллиардтан астамы материалдық-техникалық жабдықты жақсартуға бағытталады, – деді облыс әкімі.
Өңір басшысы қоғамдық тәртіпті қамтамасыз ету үшін құқық қорғау органдарын қолдау жолғасатынын айтты.
– Материалдық-техникалық базаны жаңарту облыстағы жедел жағдайды жақсартумен тікелей байланысты. Өңірдегі жағдай тұрақты, қылмыстың алдын алу бойынша ауқымды жұмыстар жүргізіліп жатыр. Қоғамдық тәртіпті сақтау, тұрғындардың қауіпсіздігін қамтамасыз ету үшін алда да қолымыздан келгенін жасаймыз, – деп алғысын білдірді Қарағанды облысының Полиция департаментінің бастығы Нығмет Исмағұлов.
Полиция департаменті бастығының орынбасары Нұриддин Дауылбаевтың айтуынша, автопарк жыл сайын жаңарады және қызметтік көлік қажеттілігі 85%-ға қамтамасыз етілген. Сондай-ақ 100 арнайы көлік қалада және трассаларда қызмет ететін патрульдік полицияға берілді. Бұл сонымен қатар қыста қар құрсауында қалып қойған адамдарды құтқару жұмыстарын жеңілдетеді.
Жаңа микроавтобустар тергеу-жедел топтың оқиға орынына шығуы үшін кезекші бөлімдерге берілді. Ол өз кезегінде мобильділікті арттырады.
Көліктер қазіргі заманғы стандарттарға сай келеді, байланыс және бейне құрылғылармен және басқа да қажетті құрал-жабдықтармен жабдықталған.
Сонымен қатар полиция қызметкерлері еңбегі үшін марапатталды.
Қалалар мен аудандардың учаскелік полицейлеріне облыс әкімінің құрмет грамоталары табысталды.
Материалды әзірлеген Аида РАХЫМҚҰЛОВА
