Елімізде 2016 жылдан бері атап өтіліп келе жатқан Алғыс айту күніне орай Абай ауданының әкімдігінде дөңгелек үстел басындағы отырыс өткізілді.
Оған биыл құрылғанына 30 жыл толған Қазақстан халқы Ассамблеясы аудандық бөлімшесінің ,аудандық ақсақалдар және аналар кеңестерінің мүшелері қатысты.
Бұл алқалы мәжілістің басында аудан әкімі Сәбит Оспанов жиналғандарды өз өкімімен осы қоғамдық құрылымдардың құрамына енген өзгерістермен таныстырды.Сол бойынша Қазақстан халқы Ассамблеясы аудандық бөлімшесіне кіретін аудандық Ақсақалдар кеңесінің төрағалығына бұған дейін “Аманат” партиясы аудандық буынын басқарған Нұрлан Адашұлы,ал аудандық аналар кеңесінің төрағалығына аудандық орталықтандырылған кітапханалар жүйесінің директоры Перизат Әбілдина тағайындалды.
Келесі кезекте жиынға қатысушылар аудандық Денешынықтыру-сауықтыру орталығының директоры Борис Цайдың өз отбасының тағдыры туралы айтқан әңгімесін тыңдады.Ол Кеңес заманында Қазақстанға күштеп көшіріліп,мұнда қазақ халқының оларды жақсы қабылдап,қамқорлық көрсеткені үшін өз қандастары корейлер атынан алғысын білдірді.
Дөңгелек үстелге қатысушылар арасында да қоғамдағы ынтымақ пен бірлікті нығайтуға,зейнетке шықса да жас ұрпақ тәрбиесіне үлес қосып жүргендеріне байланысты алғыс айтуға лайық жандар аз болмады.Солардың бірі тәжірибелі педагог,зейнеткер ана Үндемес Чегироваға “Қазақстанның Алтын кітабы” құрмет медалі мен жинағы табыс етілсе,Аудан әкімі Сәбит Оспанов жеңіл атлетикадан Дубайда өткен ерекше жандар арасындағы халықаралық жарыста күміс медаль алған Игорь Хлыстовқа 1 миллион теңгенің және оның жаттықтырушысы Тоқтар Жақыповқа 300 мың теңгенің сертификаттарын табыстап,олардың аудан мен еліміздің абыройын әлемде асқақтатқандарына шынайы алғысын айтты.
Бұдан кейін Сәбит Оспанов аудандағы “Русалица” славян,татар-башқұрт,украин,дұнған және “Родники”,”Сударушки” этномәдени бірлестіктерінің төрағаларына ұлтаралық бірлік пен келісімге қосқан үлестері мен этникалық мәдениет пен дәстүрлерді сақтап,дамытқандары үшін алғыс айтып,оларға жаңа музыкалық аппаратура сыйлады.
Дөңгелек үстел барысында аудан өнерпаздары өз алғыс сезімдерін ән-күймен жеткізіп,оны аудан әкімі Сәбит Оспанов:–Бүгін пайдалы және маңызды іс-шара өтті.Біз еліміздің басты байлығы – ынтымақ пен келісімді сақтау қажеттігін жан-жақты талқыладық.Сол үшін де сіздерге мың алғыс! – деп қорытындылады.
Ержан Имаш,
Абай ауданы
Суреттер ұйымдастырушылардан
