Ақтоғайда ақын Салтанат Смағұлтегінің жаңа кітабының тұсауы кесілді
Ақтоғай ауданының Мәдениет үйінде «Үзілмес үмітімнің мақпалын-ай» атты ақын, Қазақстан Жазушылар одағының мүшесі, «Шабыт» халықаралық шығармашыл жастар фестивалінің лауреаты, профессор Салтанат Смағұлтегінің шығармашылық кеші өтті. Рухани шараға Ақтоғай ауданының әкімдігі, мәдениет бөлімі және аудандық мәдениет үйі қолдау көрсетіп, кеш барысында ақынның өмір жолы мен шығармашылығына арналған әдеби бағдарламалар ұсынылды. Поэзия мерекесіне жиналған жұртшылық ақынның жаңа жырларын тыңдап, көркем композициялар мен арнайы дайындалған сахналық қойылымдарды тамашалады.
Кеш шымылдығы Ақтоғай аудандық мәдениет үйінің ұжымы дайындаған жүрекке жылы поэтикалық қойылыммен ашылды. Ақын өлеңдері сахналық тілмен әсем өріліп, туған жерге сағыныш, жырдың мәңгілік нәзік тынысы көркем қимыл арқылы бейнеленді. Ақын поэзиясына тән сыршылдық сахнаның әр тұсынан сезіліп, өлең мен әуен сабақтасқан шағын театрландырылған көрініс көрерменді баурап алды. Сахнаға – ақын Серік Сағынтай көтеріліп, жырсүйер қауымды құттықтай отырып, кеш иесін ортаға шақырды. Ол: «Арайлы Ақтоғайдан басталған ақынның өркешті үні бүгінде талай жүректі тербеп келеді» деп, Салтанат Смағұлтегінің шығармашылық әлемін таныстыра өтті. Шағын сұхбаттан соң ақын алғашқы топтама өлеңдерін оқып, өз жүрегінің ең алғашқы бояуларын қайта жаңғыртқандай әсер қалдырды. Оның дауысында баяу сағыныш, нәзік үміттің үні сезілді.
Кеш барысында Ақтоғай ауданының әкімі Абылай Аманжолов сахна төріне көтеріліп, ақынға арнайы құттықтауын жеткізіп, сый-сияпат тарту етті. Сонымен бірге, мемлекеттік тапсырыс аясында жарық көрген «Күз күмбірі» атты жаңа кітабының тұсаукесер рәсімі өтті. Тұсаукесерді Абылай Аманжоловпен бірге Қазақстан Жазушылар одағының облыстық филиалының директоры Жанат Жаңқашұлы, жазушы Төкен Әлжантегі, ақын Ардақ Игенова атқарды.
Кештің бір бөлігі ақын достары мен әріптестерінің жыр шашуына арналды. Серік Сағынтай залда отырған қадірлі меймандардың есімін атап, ілтипат білдіріп, сахнаға шақырды. Сахнаға көтерілген Мүсіркеп Сейдахмет, Тілеген Елеусізбайұлы, Айбек Байтөре, Ардақ Игенова, Мөлдір Бөлекова, Айгүл Кептербаева, ұстазы Әлімжан Жақан, мәдениет саласының майталманы Раушан Жылтыбаева, сатирик Әдебиет Жұманов, журналист Ернат Рахметолла, қаламгер Қасымхан Ғалым өздерінің жүрекжарды тілектерін білдіріп, өлеңдерін оқыды. Әдеби ортаның қадірлі ізі сахнада айқын сезіліп, ақынға деген құрмет өз өрнегін тапты.
Салтанат Смағұлтегінің екінші топтама жырларын Бөкетов атындағы Ұлттық зерттеу университетінің студенттері – Нұрасыл Аманжол, Салтанат Қуаныш, Сағынтай Ақжігіт, Қазыл Ұлан, Мағжан Құдайберген, Қазыл Ұландар – оқып, жаңа буынның үнінде ақын әлемін жаңаша сипатта жеткізді. Бұдан кейін сахнаға ақынның жары – ақын Ерқанат Кеңесбекұлы көтеріліп, авторлық әндерін орындап, кештің әуезін тереңдете түсті.
Кеш иесі өзінің толысқан кезеңде туған, философиялық тереңдікке толы үміт пен сырға суарылған өлеңдерін оқып, кештің шарықтау сәтін жасады. Сахна төрінде сезім мен ойдың өрнегі қатар жүріп, көрерменді поэзияның мөлдір әлеміне жетеледі.
Көңілді кеш «Тоқырауын толқындары» халықтық ән-би ансамблінің әсем ән шашуымен аяқталды. Шара соңында көрермендер ақынның кітаптарына қолтаңба алып, естелік суретке түсіп, шығармашылық жылылыққа толы әдемі әңгімелермен тарқасты.
Нұрдос КӘРІМ,
«Ortalyq Qazaqstan»
Ақтоғай ауданы
