Ақтоғай ауданында «ақылды ферма» бар

Ақтоғай ауданы, Сарытерек ауылындағы қымыз өндіретін «SAQ NS» шаруашылығын «ақылды ферма» десе де болады. Тәулігіне 1 тонна 200 литр қымыз алуды межелеген шаруашылықтың жоспары – жүйелі, мақсаты – айқын.

– Жобаны қолға алып, іске қосқанымызға бір жыл болды. Отбасылық кәсіп деп айтуға болады. Жобаның 45% инвестициясы өзімізден, қалғанын «Аграрлық несие корпорациясынан» 10 жылға 7%-бен несие алдық. Бұл мемлекет тарапынан жасалған тиімді қолдау. Шаруашылық толығымен автоматтандырылған. Биені сауу, күбіге бару, одан кейінгі жуып-жаю процесстері неміс технологиясының негізінде цифрлы түрде жүзеге асады. Яғни, артық еңбек күші де қажет емес, әрі уақытқа үнем. Бес адамды жұмыспен қамтыдық. Шаруашылықты одан әрі дамытуға арнайы бес жылдық жоспар құрылған. Басты мақсат – өзіміз өндірген ауыл шаруашылық өнімдерін ешқандай делдалсыз саудалау. Бүгінде қымыз арнайы сайт арқылы саудаға шықты. Түскен табысқа көңіл толады. Сонымен қатар, қымыз өндірудегі межені арттыру мақсатында жергілікті тұрғындардың да биелерін сауып, сатып алуды жолға қойғалы отырмыз, – дейді шаруашылық басшысы Нұрым Мұхамедиев.

Сағыныш ӘБІЛ,
Ortalyq.kz

Автордың «Агроөнеркәсіп өрісі кеңейеді» атты мақаласынан.