Еліміздің саяси жүйесін кешенді жаңғырту бағдарламасы ұсынылды

Бұл туралы Мемлекет басшысы Қасым-Жомарт Тоқаев Қазақстан халқына Жолдауы барысында хабарлады. 

Мен бүгін еліміздің саяси жүйесін кешенді жаңғырту бағдарламасын ұсынғалы отырмын. Бұл құжат ең алдымен қоғамның қажеттілігіне және сұранысына негізделген. Парламент депутаттары, Конституциялық кеңес, Орталық сайлау комиссиясы, Жоғарғы Сот және беделді сарапшылардың ұсынымдары назарға алынды. Ұлттық қоғамдық сенім кеңесінде осы тақырып бойынша пікірталас өтті. Құжатты әзірлеу кезінде зерттеушілер мен қоғам қайраткерлерінің, саяси партиялар мен үкіметтік емес ұйымдардың ұсыныстары мұқият зерделенді, — деп атап өтті Президент.

Сонымен қатар ол мұны қолға алынған түрленімдердің жалғасы деп санайды.

Біріншіден, жүйелі демократияландыруға ықпал етеді. Екіншіден, мемлекеттің тұрақтылығы мен оны басқарушылықты қамтамасыз етеді. Бұл мемлекет ішінде орын алған, сондай-ақ үдемелі геосаяси шиеленістер кезінде аса маңызды. Ағымдағы халықаралық жағдай көбінесе қырғи-қабақ соғыстың барынша өткір кезеңдерін еске салады, — деді Қасым-Жомарт Тоқаев.