Аймағамбетов ұлының мектеп формасына қанша жұмсады?

Бүгін Үкімет отырысынан кейін журналистер министр Асхат АЙМАҒАМБЕТОВТЕН ұлына мектеп формасын алуға қанша қаражат жұмсағанын сұрады. Кейін министр әлеуметтік желідегі парақшасында сатып алынған заттардың чегін де көрсетті.

«Ұлым мемлекеттік мектепте оқиды және оқу жылына басқа ата-аналар сияқты дайындаламыз. Жексенбі күні ұлым екеуіміз «….» дүкенінен 36 000 теңгеге жейде, костюм, шалбар және галстук сатып алдық», – дейді Асхат Аймағамбетов.

Түбіртектен заттардың құнын және оның жалпы сомасын есептеп көруге болады. Сондай-ақ мектеп формасынан бөлек шамамен 20 мың теңгеге портплед сатып алынғанын да байқауға болады.

«Жауабымды растау үшін сатып алынған заттардың түбіртектерін қоса салып отырмын.
Бір түбіртекте сома 26 мың теңге (Пиджак. Шалбар. Жейде). Екінші түбіртекте – 10 мың теңгеден жоғары (тағы бір жейде мен галстук). Жалпы сомасы 36 мың теңгеден асады. Портплед шамамен 20 мың теңге.
Бұрын сатып алынған мектеп формасы барын да айтқым келеді. Яғни былтырғы киімдерін балам биыл да киеді», – делінген министрдің жазбасында.

Министрліктің 475 мың мұқтаж балаға мектеп формасын сатып алуына қаржылай көмек көрсету шараларын қадағалап отыратынын атап өткім келеді. Оқу жылы қарсаңында Үкімет бұл мәселені бақылауға алды. Премьер-министр тиісті тапсырмалар берді.