Балқаш тарихи-өлкетану музейінде БалқашЛаг тұтқыны болған литвалық Владас Кастас ТИЛАНЫҢ көне скрипкасы сақтаулы тұр. Қызыл ағаштан жасалған аспап 2000 жылы жәдігерлер қатарына қосылған.
– Бұл құнды жәдігерді музейге Бейбіт Әлімбаев есімді азамат тапсырды. Скрипканың иесі – БалқашЛагта қамауда болған литвалық Владас Кастас Тила. 1950 жылдары Балқашқа жер аударылған. Қаншама қиындықты басынан кешірсе де ол скрипкадан қол үзбеген. Өз қолымен 8 скрипка жасаған. Алғашқы жасаған скрипкасын әпкесіне сыйлаған. Біздің қолымыздағы көне аспаптың ішегіне жылқының қылын пайдаланған. Шебердің қолынан шыққан дүниені шет мемлекеттен келіп, тамашалайтындар бар, – дейді музей қызметкері Асыл Серікқызы.
Кейін ақталып шыққан скрипкашы өмірінің соңына дейін Балқаш қаласында тұрыпты. Бүгінде музейде тұрған скрипка сол азалы жылдардан сыр шертіп тұрғандай…
Нұрдос КӘРІМ.
БАЛҚАШ қаласы.
