Президент сайлауы – 2022: 3 кандидат талапқа сай емес
Орталық сайлау комиссиясы президенттікке үміткер Хайрулла Ғабжалилов, Талғат Ерғалиев және Фатима Бизақованы талапқа сай емес деп тапты. Бұл туралы tengrinews.kz хабарлады.
ОСК төрағасы Нұрлан Әбдіров кандидаттар Конституция мен “Қазақстан Республикасындағы сайлау туралы” Конституциялық заңда белгіленген талаптарына сай келмейтінін айтты.
Талғат Ерғалиевті президенттікке кандидат ретінде “Қазақстан құрылысшылар одағы” заңды тұлғалардың республикалық бірлестігі ұсынған болатын.
ОСК мүшесі Ерғалиевтің мемлекеттік қызмет өтілі 3 жыл 4 ай екенін, заң бойынша жұмыс өтілі 5 жылдан кем болмауы тиіс екенін айтты. Сонымен қатар, “Қазақстан құрылысшылар одағы” “Сайлау туралы” конституциялық заңның 55-бабының 1-тармағының нормаларына сәйкес келмейтінін ескертті.
“Құрылысшылар одағы заңды тұлғалардың бірлестігі. Ал сайлауға республикалық қоғамдық бірлестік қана ұсынуға құқылы”, – деп түсіндірді Әділет министрлігінің тіркеу қызметі және заңгерлік қызмет департаментінің директоры Алан Тіленчиев.
Хайрулла Ғабжалиловты “Асар» оралмандар қауымдастығы” республикалық қоғамдық бірлестігі ұсынған болатын.
ОСК талабы бойынша президенттікке кандидат Қазақстан азаматы болуы керек, ал Ғабжалилов қандас, ол Қарақалпақстанда туған.
Фатима Бизақова “Практикалық психология” республикалық қоғамдық бірлестігінен президенттікке кандидат ретінде ұсынылды.
ОСК мәліметінше, Бизақованың мемлекеттік қызметте тәжірибесі жоқ.
