Тұңғыш Президент туралы заң жыл соңына дейін күшін жояды

«Елбасы туралы» заң жыл соңына дейін күшін жояды. Бұл туралы Парламент Мәжілісінің депутаты Ерлан Саиров айтты, деп хабарлайды Ortalyq.kz сайты egemen.kz-ке сілтеме жасап.

Тұңғыш Президент туралы заң жыл соңына дейін күшін жояды

Е.Саировтың айтуынша, қазір Мәжілістің бейіндік комитетінде «ҚР Тұңғыш Президенті — Елбасы туралы» заңның күшін жою бойынша жұмыс жүріп жатыр.

«Депутаттардан «ҚР Тұңғыш Президенті — Елбасы туралы» заңның күшін жою туралы мәселе жиі сұралады. Қазір бейіндік комитетте жұмыс жүріп жатыр. Жыл соңына дейін аталған заң өзінің заңды күшін жояды», деді ол.

Айта кетсек, референдумнан кейін Конституциядан Елбасыға қатысты тармақтар алынып тасталған.

«Конституцияда Елбасының саяси рөлі немесе басқа да еңбегі туралы айтылмайды. Қазір Конституцияға сәйкес заңнамалық актілерді келтіру процесі жүріп жатыр. Бұл үдерісте «Тұңғыш Президент – Елбасы туралы» заң өзінің заңды күшін жоғалтады», деп қосты Ерлан Саиров.

Еске сала кетсек, 2022 жылғы 16 маусымда Парламент Сенатының кулуарында Әділет министрі Қанат Мусин Елбасының өкілеттігі туралы Конституциялық заңның жойылатынын мәлімдеген еді.

Қарағанды облысының маңызды және өзекті жаңалықтарын «Орталық Қазақстан» газетінің телеграмм каналынан оқыңыз (сілтемені басыңыз)