Бұқар жырау ауданында 10 кәсіпкер әкім грантына ие болды
Бұқар Жырау ауданында сұлулық студиясы, сүт цехы, микро аскөк өсіретін жылыжай ашылады. Ісін жаңа бастаған кәсіпкерлердің он жобасы қолдау тауып, әрқайсысы миллион теңгеден грантқа ие болды.
27 жастағы Назар Оспанов Петровка ауылында демалыс аймағын ашты. Өз жобасын жүзеге асыру үшін алдымен Нұра өзенінің жағажайынан екі Камаз қоқыс шығарып, іргелес аумақты ретке келтіруге тура келді. Ол өткен айдан бастап жұмыс істей бастады және қазірдің өзінде тұрақты клиенттері бар. Адамдар жағажайға демалуға келіп, шатыршаларды, киіз үйлерді жалға алады. Назар гранттар конкурсына бизнесін кеңейту үшін қатысуға шешім қабылдағанын айтады.
– Жыл сайын адамдар жабайы жағажайда өзенде шомылып, демалғаннан кейін жағада қоқыс үйінділері қалып отырады. Осыны бақылай отырып, мен учаскені ретке келтіруді шештім, оны тазаладым, онда шатырмен көмкерілген орындықтар, киіз үйлер, дивандары бар үстелдер орнаттым. Қазір адамдар мәдени демалады, бізде қоқыс бактары бар, барлығы дер кезінде шығарылады, – дейді Назар. – Мен білімім бойынша техник-технологпын, ірі кәсіпорында ауысым бастығы болып жұмыс істеймін. Ал демалыс аймағы – бұл менің қосымша табысым, өйткені бизнес маусымдық. Өз аймағымды кеңейту үшін мен гранттар байқауына қатысып, жеңіске жеттім. Қолдау көрсеткені үшін мемлекетке рахмет!
Ботақара кентінің тұрғыны Айдын Күніспеков бетон дуалдарын өндіруге грант алды. Ауданда осыған ұқсас жобалар жоқ. Жас бизнесмен тұрақты табысқа жетуді және бірнеше адамды жұмысқа орналастыруды жоспарлап отыр.
Сондай-ақ, жақын арада аудан орталығында кеспе тастар өндіретін цех, сұлулық студиясы, баспахана және микро аскөк өсіретін жылыжай ашылады.
Доскей ауылында массаж салоны іске қосылады, онда массаждың барлық түрін білікті шебер Сабина Оразбаева жасайтын болады.
Петровкада Нина Кудинованың шаштаразы пайда болады. Байқадам ауылында шиномонтаж станциясы ашылады, ал Ростовкада дәмді сүт өнімдері шығарылады.
Биыл Бұқар Жырау ауданы әкімінің грантына 10 миллион теңге бөлінді.
