Жәрдемақы мерзімі ұзаруы мүмкін

Елімізде бала күтімі бойынша бір жасқа дейін берілетін жәрдемақының мерзімі ұзаруы мүмкін. Бұл туралы орталық коммуникациялар қызметінде өткен брифингте «Мемлекеттік әлеуметтік сақтандыру қоры» АҚ бас директоры Нұрсұлу Кемел айтты.

Енді жәрдемақы қосымша жарты жылға дейін төленбек. Бұл – тек ұсыныс қана.

«Біздің міндетіміз – бұл жүйенің тұрақтылығын, қаржылық орнықтылықты қамтамасыз ету. Әлеуметтік міндеттемелер ұзақмерзімді сипатты болуы керек. Мүгедектігі бар немесе біреудің қарауындағы адамдар мұндай төлемдерді ай сайын алады. Бүгінгі жағдайды ескере отырып, бала күтімі бойынша тағайындалатын жәрдемақыны 1,5 жасқа дейін ұзарту қарастырылуда», – деді Нұрсұлу Кемел. 

Айта кетейік, бүгінгі таңда жұмыс істемейтін әйелдер бала 1 жасқа толғанға дейін ай сайын 18-23 мың теңге көлемінде жәрдемақы алады.
Бір реттік төлем көлемі – 38 АЕК. Ол барлық ата-аналарға табысына қарамастан, бірдей беріледі. Төртінші баладан бастап 63 АЕК төленеді.

Өз тілшімізден.