33 жабық учаскеде дауыс беру жүріп жатыр
Таңмен таласа басталған сайлау дүбірі – аса қарқынды. Әсіресе, қарағандылық сайлаушылардың белсенділігі жоғары. Алғашқы үш сағатта (10.00-ге дейінгі) тіркелген сайлаушылардың 32,27%-ы өз таңдауларын жасап үлгерген.
Сондай-ақ, облыс аумағында 33 жабық сайлау учаскесі жұмыс істеп тұр. Бұл санатқа кіретін сайлау учаскелері – түзеу мекемелері, уақытша ұстау изоляторлары және ауруханалар. Арнайы жабдықталған бұл мекемелердегі дауыс беру белсенділігі жоғары екендігін айтады облыстық сайлау комиссиясының төрағасы Қайрат Нұркенов.
– Облыс аумағында орналасқан 33 жабық сайлау учаскесінде дауыс беру өз ырғағымен жүріп жатыр. Ол жерлерде байқаушылардың қатысуына ешқандай тыйым салынбаған, – дейді Қайрат Қаршығаұлы.
Яғни, бостандығы мен мүмкіндігі уақытша шектелген азаматтардың сайлау құқығы шектелмейді.
Ерсін МҰСАБЕК