40 оқушы мектеп сөмкелері мен оқу құралдарын сыйлыққа алды
Республикалық «Мектепке жол» акциясы аясында «Халық банкі» өңірдің әлеуметтік осал отбасылардың балаларына қолдау көрсетті. Білім басқармасында “Қазақстан халық банкі” АҚ Қарағанды облыстық филиалының директоры Иван Скородиевский мен Бала құқықтарын қорғау жөніндегі уәкіл Ирина Киселева балалар мен ата-аналарға оқу құралдарының толық жинағы салынған 40 мектеп сөмкесін табыс етті.
Игі бастаманың мақсаты – әлеуметтік көмек қажет ететін отбасыларға жаңа оқу жылына дайындық барасында қолдау көрсету және мектеп табалдырығын енді аттайтын бірінші сынып оқушыларына есте қаларлықтай қуанышты көңіл күй сыйлау.
Халық банкі мұндай қайырымдылық акцияларға тұрақты түрде қатысады. Соңғы 7 жыл бойы банк «Мектепке жол» республикалық акциясына белсенді түрде атсалысып келеді. Жыл сайын еліміздің түкпір-түкпіріндегі оқушыларға мектеп сөмкелері мен оқу құралдары табысталады. Биыл шамамен 3000 бірінші сынып оқушысы сапалы мектеп сөмкелері мен оқу құралдарын сыйлыққа алыпты.
– Мектеп табалдырығын алғаш аттағалы отырған балалар үшін жаңа ортаға бейімделу — психологиялық тұрғыдан оңай емес. Ата-аналарға да өздерін және баланы мектепке дайындау
біршама күш пен дайындықты қажет етеді. Осы тұрғыда, мұндай шағын сыйлықтар арқылы бұл маңызды кезеңді жылы әрі жағымды естелікке айналдыруды көздейміз, – деді Иван Скородиевский.
Айтуынша, «Халық банкі» тек осы акциямен шектелмек емес. Былтыр Білім басқармасымен бірлесіп,
тағы бір маңызды бастаманы қолға алған.
– Біз «Bilimal.kz және Kundelik.kz» атты бірлескен бағдарламаны іске қостық. Бұл бағдарлама аясында банк балаларды қаржылық сауаттылыққа үйретіп, үздік оқушыларға ынталандыру мақсатында бағалау жүйесін енгізді. Алғашында бұл жоба 5–11 сыныптар аралығында жүзеге асырылса, биылдан бастап 2–11 сынып оқушылары қамтылады. Бағалау жүйесінде де біраз өзгерістер болады — әр балаға жеке тәсіл қарастырылған. Сонымен қатар, биыл арнайы ұтыс ойындары өткізіледі.
Әр қатысушы 100-ге дейін бонус ұтып ала алады. 100 мың бонусқа дейін иеленуі мүмкін. Ұтыс нәтижесінде Қазақстан бойынша 1000 оқушы жеңімпаз бола алады. Мұндағы басты мақсат — тек ақша табу емес,
сонымен бірге еңбек арқылы жетістікке жету, үздік бағаға ұмтылу және жинаған қаражатын дұрыс жұмсауды үйрену, – дейді банк басшысы.
Сонымен қатар, акцияға Астана қаласының «Ана қолы» қоғамдық қоры мен «Wooppay» ЖШС демеушілік қолдау көрсетті. Көмек қажет ететін балаларға оқу құралдарынан бөлек, балаларға қажетті басқа да құрал-жабдықтар табыс етті. Өңірдің шалғай аймақтарында тұратын балалар мен ата-аналарға оқу-құралдарын жеткізу қызметін де ұйымдастыруда.
Оқу құралдары әлеуметтік аз қамтылған отбасылардың және көпбалалы отбасының балаларына, ерекше білім беруді қажет ететін балақайларға табыс етілді.
Қала тұрғыны Гүләсия Садықова биыл көпбалалы ана ретінде баласына мұндай көмекті алғаш рет алып отыр.
– Ұлым биыл №37 мектепке бірінші сыныпқа барады. Осындай көмек беріп жатқан жанашырларға рақметімді айтамын. Көпбалалы аналар үшін де үлкен көмек. Осындай игі шаралар жалғасын таба берсін, – деді ол.
Гүлнұр СЕРІКЖАНҚЫЗЫ,
“Ortalyq Qazaqstan”
