«Жас келсе іске» демекші, Приозерск қаласында кәсіптің көзін тауып, ісін дөңгелетіп отырған жастардың саны жыл сайын артып келеді. Жас кәсіпкер Сырым ПЕРДЕБАЕВ та сондай жастардың бірі.
Негізінен, еңбек етуші халықтың көпшілігі шағын және орта бизнес арқылы нәпақасын айырғанда ғана еліміздің белгілі бір тұрақтылыққа қол жеткізетінін Сырым жақсы біледі. Кәсіпкерлікпен айналысу бала күнгі арманы екен. Талай мәрте ашқысы келетін кәсібін арнайы бағдарлама арқылы анықтап, бизнес жоспар құрыпты. Оны жүзеге асыру үшін қаржы тетіктерін қалай тарту керектігі жөнінде ізденген көрінеді. Бірнеше жыл бұрын Қайрат Тұрар және Берік Мырзагелді деген замандастарымен «Zhas Projekt» жобасына қатысып, грант ұтып алған. Олар ұтып алған қаражатына су сүзгіш құрылғысын сатып алып, тазартылған суды ардагерлер мен тыл еңбеккерлеріне тегін таратып, алғыс арқалаған. Осылайша мектепте жүрген кезінен қайырымды істерге қолдау білдірген. Тәуекелге бел буып, өткен жылы кәсібін ашқан жігіт бүгінде бір адамды жұмыспен қамтамасыз етіп отыр.
– Бүгінде облыста жастарды кәсіпкерлік негіздеріне үйрету, оқыту, өз ісін ашуға ынталандыру қарқынды жүргізілуде. Елімізде жастар саясатының тиімділігін арттыруға баса көңіл бөлінген. Кәсіпкерлікті дамыту мақсатында «Атамекен» Ұлттық кәсіпкерлік палатасымен бірлескен жұмыстар атқарылып, біз сияқты жастардың кәсіп ашуына зор мүмкіндік жасалды. Мен де, «Атамекен» кәсіпкерлік палатасында білімімді жетілдірдім. Соның арқасында қайтарымсыз грант ұтып, «Донер тағам» өндірісін аштым. Қазіргі таңда бұл тағам түрі қаламызда сұранысқа ие. Сондықтан, «Донер» әзірлейтін қажетті аппараттарды сатып алып келдім. Одан бөлек, мұздатқыштар мен күнделікті донер жасағанда қолданатын заттарымды толықтырдым, – дейді Сырым Пердебаев.
Кейіпкеріміздің айтуынша, екі бірдей дипломы бар. Колледжді – «металлург», университетті «Мемлекеттік және жергілікті басқару» мамандығы бойынша бітірген. Анасы үй шаруасында. Өзінен кейін жалғыз қарындасы бар. Бүгінде отбасының асыраушысы, қамқоршысы. Жас кәсіпкер, сан түрлі қиындықтарды да, жетістіктерді де басынан өткеріп, істеген ісінің нәтижесінен сабақ алуды жақсы меңгерген. Алдағы уақытта кәсібін кеңейтуді көздеп отыр.
Нұрдос КӘРІМ.
ПРИОЗЕРСК қаласы.
