Биыл Қазақстанда әлеуметтік ID-карталарды енгізу жоспарлануда

Қазақстанда жыл соңына дейін әлеуметтік ID-карталар енгізіледі. Бұл туралы ОКҚ брифингінде ҚР Еңбек және халықты әлеуметтік қорғау министрі Біржан Нұрымбетов мәлімдеді.

Бүгінгі таңда ЕХӘҚМ бірқатар маңызды цифрлық жобаларды жүзеге асыруда. Олардың ішіндегі ең маңыздысы — «отбасының әлеуметтік картасы», оған Қазақстан халқының 100%-ы — 7 млн отбасы қатысты. Әлеуметтік карта әрбір отбасы қандай өмірлік жағдайда екенін, оны шұғыл немесе дағдарыс жағдайынан шығару бойынша жұмыс алгоритмін көрсетеді.

— Әлеуметтік карталарды қалыптастырғаннан кейін қиын-қыстау және дағдарыстық жағдайларында болған 101 мың отбасы анықталды. 12,7 мың адамды жұмысқа орналастыру, емханаларға 68,8 мың адамды, балабақшалар мен мектептерге 72,9 мың баланы тіркеу жөнінде шаралар қабылданды. 1 451 отбасы дағдарыстық, қиын-қыстау жағдайдан шығарылды, — деп хабарлады Біржан Нұрымбетов.

Тағы бір маңызды жоба — «Қазақстан азаматының әлеуметтік ID-картасы». Ол әлеуметтік жәрдемақы алудың ашықтығын, ыңғайлылығын арттыруға бағытталған. Әлеуметтік ID АӘК төлеуді, қоғамдық көлікте жеңілдікпен жол жүруді, көп балалы және аз қамтылған отбасылардың балаларына мектептерде тамақтануды және т. б. қарастырады.

— Бұл жобаның пилоттық нұсқасы республиканың 9 өңірінде жүзеге асырылды. 102 мың ID-карта берілді, 88 мың транзакция жүргізілді. Алдағы уақытта біз бұл жобаны республиканың барлық өңірлеріне ауқымын кеңейтуді жоспарлап отырмыз, — деді еңбек министрі. — Жылдың соңына дейін біз халықтың әлеуметтік осал топтары үшін барлық қызметтерді жүйелеуге көмектесетін электрондық ID-картасын аяқтағымыз келеді.

Әмбебап картада сондай-ақ бірқатар мемлекеттік қызметтер біріктіріледі деп жоспарлануда: зейнетақы мен жәрдемақы алу, карта арқылы сауда, медициналық және басқа желілердегі тауарлар мен қызметтер үшін есеп айырысуға болады, яғни ол банк картасы ретінде де шығады.

Қазақстан Республикасы Еңбек және халықты әлеуметтік қорғау министрлігі.