Бір жылда тегін 13 мың ота жасалды
Былтыр Қарағанды облыстық клиникалық аурухана дәрігерлері 3841 жоспарлы және 9211 шұғыл ота жасаған. Бұл – МӘМС аясында, ал, шұғылы – тегін медициналық көмектің кепілдік берілген көлемі бойынша көрсетілді. Бұл туралы Медициналық сақтандыру қоры Қарағанды филиалы баспасөз қызметі хабарлады.
Ресми деректердің мәлімдеуінше, ең жиі кездесетін оталар – омыртқааралық жарық, қалқанша бездегі қатерлі ісіктерді жою, өт қабын лапароскопия тәсілмен алып тастау, лапароскопиялық аппендэктомия, аяқ-қол, өкпе және бронх, жамбас мүшелеріне хирургия, уретралды стенттеу.
– МӘМС арқылы бүйрекке, көкбауырға, бауырға және өттің шығу жолдарына лапароскопиялық, асқазанға реконструктивті, бариатриялық операциялар (семіздік кезінде) жасалады. Шұғыл көмек мәртебесіне қарамастан тегін көрсетіледі. Дәрігерлердің басты міндеті – науқастың денсаулығына, өміріне төнген қауіпті жою, – дейді хирургия бойынша ОКА директорының орынбасары Борис Цхай.
Сақтандыру қоры шұғыл медициналық көмектің жіті аурулар мен созылмалы аурулардың кенеттен асқынуы кезінде көрсетілетінін атайды.
Өз тілшімізден.