24 сағат жұмыс істейтін кітапхана ашылды

“Адамды адам қылған – кітап, адамзат еткен – кітапхана” депті кемеңгер жазушы Әбіш Кекілбаев. Академик Е.Бөкетов атындағы Қарағанды зерттеу университетінде заманауи кітапхана ашылды. Бұл – білім мен руханият үшін үлкен жаңалық.

Аталған жаңа кітапхана – студенттер мен оқытушылар үшін ақпарат алу алаңы ғана емес, ой өрбітіп, ғылымға ден қоюға мүмкіндік беретін қасиетті орда.

– Негізгі мақсат – жас буынға құнды білім беру. “Аса мәртебелі студент” дегенді жиі айтамыз. Барлық игілік студенттер үшін жасалып жатыр. Жасала береді де. Мәселен, Жапония, Америка сынды дамыған елдерде кітапхананың 24 сағат жұмыс істейтінін көрдім. Ал, бізде 18:00-де жабылып қалады. “Кейінгі кезде жастарға дұрыс жағдай жасамай жүрміз бе?” деген ой мазалай берді. Неге біздің Арқа жерінде осындай жағдай жасамасқа? Міне, бұған да жеттік. Енді, бұл кітапхана тәулігіне 24 сағат жұмыс істейді, — деді университет ректоры Нұрлан Орынбасарұлы.

Қазіргі таңда ақпаратқа қолжетімділік артқанымен, кітаптың құндылығы ешқашан жойылған емес. Жаңа кітапханасының цифрлық жүйеге негізделуі – білім алушылардың уақытын үнемдеп, ізденісін жеңілдетуге зор мүмкіндік береді. ID карталар арқылы қажетті кітапты өз бетінше тауып, қолдану уақыт талабына сай жасалған тиімді шешім дер едік.

Тұсаукесердің ең басты қонағы асылдың сынығы, Мұхтар Мағауиннің ұлы Едіге Мағауин кітап үйінің ашылуымен құттықтап, жылы естеліктерімен бөлісті.
Университет кітапханасына классик жазушы Мұхтар Мағауиннің 20 томдық толық жинағын сыйға тартты.
Өз кезегінде Едіге Мұхтарұлына да университет тарапынан сый-сияпат жасалды.
Кітапханада конференц-зал, мультимедиялық ресурстар залы, сирек қор залы сияқты түрлі бағыттағы сегіз оқу залы бар.
Әсіресе, Wi-Fi желісімен қамтылып, цифрлық жүйенің енгізілуі білім алушыларға зор көмек.
Бұдан бөлек, кітапханада ғылыммен айналысатын жандарға арналған сирек кітаптар қоры да құрылған.

Жәлел ШАЛҚАР