Облыс әкіміРесми

Облыстағы экологиялық мәселелерді шешу үшін қандай шаралар қабылдануда

Қарағандыда экология мәселелері бойынша дөңгелек үстел өтті. Жыл сайын облыстың 17 ірі кәсіпорны 600 мың тоннаға жуық ластаушы заттарды атмосфераға шығарады және экология проблемасы – Қарағанды облысындағы ең өткір мәселелердің бірі. Бұл өнеркәсіптік аймақтың ерекшелігіне байланысты.

Талқылауға экология және табиғи ресурстар вице-министрі Ахметжан Пірімқұлов, Денсаулық сақтау вице-министрі Ажар Ғиният, Қарағанды облысының әкімі Жеңіс Қасымбек, өңірдегі өнеркәсіп кәсіпорындарының басшылары мен экобелсенділер қатысты.

– Жезқазған мыс балқыту зауытының іс-шаралары өңір үшін аса тиімді. 2018-2022 жылдары экологиялық тиімділікпен қос байланысудың озық технологиясын қолдана отырып, жаңа күкірт қышқылы цехын салу және іске қосу жоспарланған. Бұл күкірт диоксидінің шығарындыларын 40 мың тоннаға азайтуға көмектеседі. Байыту фабрикасы бойынша ластанудың негізгі себебі консервацияланатын қалдық қоймасының еңістері болып табылады. Еңістерді қопсыту қажет, айна бетін суару, бөгеттің шеттерін нығайту қажет, – деді вице-министр Ахметжан Пірімқұлов.

Облыстың екінші өнеркәсіптік алыбы – “АрселорМиттал Теміртау” АҚ да экологиялық проблемалардан тыс қалмайды. Кәсіпорында қоршаған ортаға эмиссияны төмендетуге әкелетін жаңғырту жоспары іске асырылуда.

 – Біз Экология министрлігімен 2024 жылға қарай шығарындыларды 30%-ға төмендету бойынша Жол картасына қол қойдық. Бұл “АрселорМиттал Теміртау” сияқты ірі кәсіпорын үшін өте үлкен мақсат. Агломерациялық және коксохимиялық өндіріспен жұмыс істейміз. Біз нақты іс-қимыл жоспарын әзірледік және пандемия салдарынан уақыт жоғалтқанымызға қарамастан, оны кезең-кезеңімен енгізудеміз, – деді “АМТ” АҚ Бас директоры Биджу Наир.

Отырыс барысында Денсаулық сақтау вице-министрі Ажар Ғиният Қарағанды облысының мемлекеттік бағдарламаларды іске асырудағы жетістіктерін атап өтті. Ол Қарағанды облысы коронавирустың ықтимал екінші толқынына дайындық бойынша көшбасшылар қатарына кіретінін атап өтті.

 – Жарты жыл ішінде Қарағанды облысында көп жұмыс атқарылды. Бұл құрылыстар, жабдықтармен қамту, кадрларды оқыту, дәрігерлерге арналған тұрғын үй құрылысы. Мұның бәрі Президенттің тапсырмасы бойынша жасалды. Мұндай қуатты және жедел жұмыс мемлекеттік бағдарламаға тұрарлық, – деп атап өтті ол.

Сондай-ақ, оның айтуынша, Қарағанды өңірі онкологиялық ауруларды ерте анықтау бойынша елдегі көшбасшылардың бірі болып табылады. Жоғары білікті дәрігерлер мен заманауи жабдықтар ісік ауруларын ерте кезеңде анықтауға және онкологиялық науқастарды сәтті емдеуге көмектеседі.

– Әрине, біз экология туралы айтқанда, денсаулық сақтау саласын да атап өтпеуге болмайды. Бұл тақырыптар бір-бірімен тығыз байланысты. Өкінішке орай, нашар экология онкологиялық аурулардың өсуіне әкеледі. Алайда, Қарағанды облысында тұрғындардың денсаулығын сақтау және оларға лайықты өмір сүру сапасын қамтамасыз ету үшін көп нәрсе жасалуда, – деді Ажар Ғиният.

Кездесу соңында спикерлер экобелсенділердің сұрақтарына жауап берді. Экология Вице-министрі Ахметжан Пірімқұлов өңір басшылығына Балқаш пен Жезқазғандағы экологиялық жағдайды жақсарту бойынша жол карталарын әзірлеуді ұсынды. Вице-министрдің айтуынша, бұл жекелеген қалалардағы ең өткір мәселелерді тиімді шешуге көмектеседі және олардың тұрғындарына көп пайда әкеледі.

Басқа материалдар

Back to top button