2026 жылдың діни күндер кестесі бекітілді: Ораза ақпанда басталады

Қазақстан мұсылмандары діни басқармасының Шариғат және пәтуа бөлімі 2026 жылғы діни күндер кестесін бекітті.

Хижри айлардың басталуы халықаралық астрономиялық зерттеу орталықтарының мәліметтері негізінде жасалды.

– Пәтуа мамандары діни мерекелердің нақты күндері жаңа айдың көрінуіне байланысты көрсетілген уақыттан бір күн шегерілуі немесе алға жылжуы мүмкін екенін ескертеді, – делінген ҚМДБ хабарламасында.

Шариғат және пәтуа бөлімінің мәліметінше, келер жылы қасиетті Рамазан айы 19 ақпанда басталады. Қадір түні – 16 наурыздан 17 наурызға қараған түнге, ал Ораза айт мерекесі 20 наурызға сәйкес келеді.

Құрбан айт мерекесі 27-29 мамыр аралығында атап өтіледі.

Бас мүфтият дерегіне сай, Миғраж түні – 16 қаңтардан 17 қаңтарға қараған түнге, ал Бараат түні – 2 ақпаннан 3 ақпанға қараған түнге түседі.

Айта кетейік, діни мерекелердің нақты уақыты айдың көрінуіне байланысты өзгеруі мүмкін, сондықтан көрсетілген күндер бір күн алға немесе артқа жылжуы ықтимал.

Материалды әзірлеген Аида РАХЫМҚҰЛОВА