2023 жылдан бастап мектептер мемлекеттік стандарттарға сай салынбақ

Қазақстанда 2023 жылдан бастап мектептер мемлекеттік стандарттарға сай салынбақ. 

Егер робототехника, физика, химия пәндік кабинеттері қажет болса, онда мектеп соған сай жабдықталуы керек. Бұл туралы Оқу-ағарту министрі Асхат Аймағамбетов айтып берді.

Министр қазіргі уақытта мектеп салынып бітеді де, лицензия алуға келгенде барлық қажетті құрал-жабдықтың жетіспейтіні белгілі болатынын айтты.

– Мәселен, спорт залын алатын болсақ, қазіргі уақытта 1 200 оқушыға арналған өте үлкен мектептер салынып жатыр. Екі ауысымды есептесек, 2 400 оқушы оқиды. Бірақ ол мектепте тек бір ғана спорт залы қарастырылған. Ал егер типтік оқу бағдарламасын қарайтын болсақ, аптасына әр сыныпта үш сағат дене шынықтыру сабағы бар. Сол үш сағатты барлық сыныпқа санайтын болсақ, онда бір спорт залы жетіспейді және бір уақытта бірнеше сынып бір спорт залында шынығады. Сондықтан бірнеше спорт залы керек. Неліктен қазір көптеген ата-ана балаларын МЖӘ бойынша салынған жаңа мектептерге беруге ұмтылады? Себебі олар толық жабдықталған және стандарттарға сай. Сондықтан бізге осындай мектептер қажет, – деді Асхат Аймағамбетов.

Министр «Қолайлы мектеп» жобасында құрылыс материалдарының сапасы және бастауыш пен жоғары сынып оқушыларын блоктарға бөлу мәселесі де қарастырылатынын айтты.

– Бұл жоба бойынша бізде қосымша 800 мыңнан астам орын беріледі және жоғарыда айтылған мәселелер шешімін табады. Бүгінде еліміз бойынша мектептерде 250 мыңнан астам орын тапшылығы бар. Егер біз осы мәселені қазір шешпесек, 2026 жылға қарай жалпы тапшылық 1 млн 200 мыңға дейін жетеді. Былтыр біз Президенттің тапсырмасы аясында 277 мектеп салдық. Биыл 225-тен аса мектеп салғалы отырмыз. Мектеп құрылысы мен қаржыландыруды әкімдіктер жүргізеді, – деді министр.