Қарағандыда остеопорозды ерте кезеңде анықтайтын аппарат пайда болды
Профессор Х.Ж. Мақажанов атындағы облыстық травматология және ортопедия орталығында жаңа заманауи жабдықтар пайда болды. Клиника денситометр сатып алды – бұл аппарат сүйек тығыздығын 98% дәлдікпен өлшеуге және остеопорозды ерте кезеңдерде анықтауға мүмкіндік береді. Қарағандылықтар мұндай тексеруден тегін өте алады.
Жақында клиникада жаңа денситометр пайда болды. Ол қазірдің өзінде іске қосылып, сынақ режимінде жұмыс істеуде. Аппарат арқылы он шақты адам тексерілді.
– Құрылғының нәтижелері керемет. Түрлі-түсті айқын сурет, дәл диагноз қоюға және ең қолайлы емдеуді тағайындауға мүмкіндік беретін өте егжей-тегжейлі сипаттама. Бұған дейін бізде ескі үлгідегі денситометр болған, ол 2008 жылдан бері жұмыс істеп келеді. Дәрігер диагноз қойғанда жалпылама сандарды ғана бере алады. Жаңа аппарат деректерді өте жоғары дәлдікпен талдайды, – деді Сәулелік диагностика бөлімшесінің меңгерушісі Мұхтар Әбілдин.
Мамандардың айтуынша, республикада осындай аппараттар саны бірең-сараң ғана. Облыс тұрғындарына жоғары сапалы медициналық қызметтерді қол жетімді етуге тырысуда. Қарағандылықтар заманауи денситометрде тексеруден тегін де, өз есебінен де өте алады.
Көрсеткіштер бойынша 40 жастан асқан адамдар осындай диагноз қою үшін учаскелік дәрігерден жолдама ала алады.
– Біз тексеру кестесін кезек болмайтындай етіп жасауға тырысамыз. Сонымен қатар, бізде өзіміздің электронды кезегіміз бар. Сондықтан адам бізге келіп, бірнеше сағат күтіп отырмайды, – дейді Мұхтар Әбілдин.
Егер адамға остеопороз диагнозы қойылса, оған алты айға емдеу тағайындалады. Осыдан кейін тест қайта тапсырылуы керек. Бөлім меңгерушісінің айтуынша, емдеу курсы сүйектерді нығайтуға ғана емес, науқастың жалпы жағдайын жақсартуға да көмектеседі.
