120 000 көрермен: Қарағандыда Кеншілер күніне арналған ауқымды концерт өтті

Кеншілер мерекесінде Қарағандыдағы Тәуелсіздік алаңы ерекше көңіл-күйге бөленді. Кеншілер күніне арналған ауқымды концертке 120 мыңнан астам көрермен жиналып, бұл көрсеткіш ел тарихындағы рекорд болып тіркелді. Бұған дейін мұндай ауқымды мәдени шара Қазақстанда өткен емес.

Мерекелік шоуды Qarmet компаниясы ұйымдастырды. Сахна төрінде қазақстандық тыңдарман сүйіктілеріне айналған AYAU, SADRADDIN, Ирина Кайратовна тобы және Қарағандыда алғаш рет ресейлік жұлдыз Zivert өнер көрсетті. Әншілердің әсерлі қойылымдары алаңға жиналған жүздеген мың көрерменнің көңілін көтеріп, ерекше эмоция сыйлады.

 Zivert алғаш рет Қарағанды сахнасында өнер көрсетіп, жүрекжарды лебізін жеткізді:

–Мен мұндай көпшіліктің алдында алғаш рет ән салып тұрмын. Шынымен таңғалдым! Баршаңызды көргеніме қуаныштымын. Бүгін сіздермен бірге Қарағандыда болып, осы керемет мереке – Кеншілер күнімен құттықтағым келеді!, – деп Zivert аймақ кеншілеріне сахнадан сәлем жолдады.

Концерт барысында Ирина Кайратовна тобы Qarmet компаниясының соңғы жетістігін атап өтті. Әртістер 80 жылдан кейін алғаш рет Теміртаудағы металлургиялық комбинатқа табиғи газ берілгенін сахнадан сүйіншілеп жеткізді.

–Сіздер естіген боларсыздар, бірақ сахнадан тағы да айтамыз. Газ қосылды, достар! Теміртаудағы металлургиялық комбинатқа 80 жылда алғаш рет табиғи газ берілді! Бұл шынымен де өңір экологиясына оң әсер етеді. Біз өңір тұрғындарын және Qarmet компаниясын осы экологиялық миссиясымен құттықтаймыз. Газ қосылды – Қазақстанда тек жақсы жаңалықтар! «Қайрат» чемпиондар лигасына өтті, ал Қарағанды – Кеншілер күні құтты болсын!, – деп құттықтады әртістер.

Жамал АКПАРОВА