Қарағанды облысының мамандандырылған ауданаралық әкімшілік сотының төрағасы Қанат Мақажановтың айтуынша, мұндай даулардың бір бөлігі әкімшілік соттың қарауына түседі.

– Өткен жылы 169 талап қою түсті. Бұл – жалпы түскен істердің 9%-ы. Оның ішінде, «Азаматтарға арналған үкімет» КеАҚ-на қарсы 147 талап қою бар. Биылғы бірінші жартыжылдықта 56 талап қою тіркелді. Оның 52-сі немесе 93%-ы – «Азаматтарға арналған үкімет» КеАҚ-на қарсы, – деп атап өтті Қанат Маратұлы өңірлік коммуникациялар қызметінде өткен брифингте.

Бұл статистикадан көрсетілетін мемлекеттік қызметтің нәтижесі сот дауларының белгілі бір бөлігін алатынын байқау қиын емес. Ал, «Азаматтарға арналған үкімет» КеАҚ мұндай даулар бойынша – негізгі жауапкер.

– Сотқа шағымданудан бөлек, сотқа дейін реттеу тәртібі бар екендігін атап өту керек. Көрсетілетін қызметтің үлгілік ережелеріне сәйкес көрсетілген қызметтің нәтижесімен келіспегенде оны қызмет берушінің басшысына немесе уәкілетті органына шағымдауға болады. Мысалға, автокөлікті тіркеуден бас тартқан жағдайда полиция департаментінің басшысына немесе мемлекеттік көрсетілетін қызметті мелекеттің бақылаушы орган болып табылатын мемлекеттік қызмет бойынша департаментке шағымдауға болады. Халыққа қызмет көрсету орталығы қызметкерлерінің әрекеттерін тікелей осы орталық директорына немесе коммерциялық емес акционерлік қоғамның облыстық филиалының басшысына шағымдауға болады, – деп түсіндірді Қанат Мақажанов.

Спикердің айтуынша, ең көп дау жер қатынастары, салық органдары және сот орындаушыларға қатысты қаралады.

– Қалыптасқан үш жылдық тәжірибеде негізінде сот процестерінің мемлекеттік көрсетілетін қызметтердің сапасын жақсартуға оң әсері барын көреміз, – деді спикер.

Жансая ОМАРБЕК,
Ortalyq.kz

Сообщение Азаматтар құқығы тапталмайды появились сначала на «ORTALYQ QAZAQSTAN» газеті.

Бүгінде Қазақстан үкіметі әйелдердің саясатқа араласуына, олардың жай ғана саясатпен айналысып қана қоймай, шешім қабылдау деңгейінде араласқанына мүдделі болып отыр. Өйткені, бұл – уақыт талабы.

Бізде әйелдердің құқығын қорғайтын заң бар. Бірақ, сол бар заңды әйелдердің өздері пайдалана алмайтын кездер де болып жатады. Заңды дұрыс білмейді.

Біз зайырлы мемлекетпіз. Елімізде ерлер мен әйелдердің құқықтары тең. Әйтсе де, бүгінде әйелдерге қарсы зорлық-зомбылық тақырыбы ең өзекті мәселеге айналуда. Ендеше, отбасының берекесі неге кетті? Жауапкершілік жүгін көтере алмаған ер азамат кінәлі ме, әлде әйел ағаттық жіберді ме? Қандай жағдай болса да, тұрмыстық түйткілдерді ерлі-зайыпты өз жауапкершіліктеріне алғаны абзал.

Қазақ халқы барша тірліктің бастауы, көркемдік пен жылулық көзі, шуақ пен мейірім әлемі, өмірдің сәні деп, әйелді қасиет тұтып, оған көңілінің төрінен орын беріп, ардақтап, аялаған. Қазір қай салада да ең озық істің алдында жүрген жолы жіңішке қауымды көптеп кездестіруге болады. Сот істерін қарау барысында гендерлік теңдік туралы талап қатаң сақталады. Ерлер мен әйелдерге қатысты заң талаптарының нақты орындалуы, процеске қатысушылардың адамгершілігін кемсітетін немесе ар-намысын таптайтын шешімдер мен іс-әрекеттерге жол бермеу, заң мен сот алдында барлығының теңдігі, тараптардың дауласуы мен теңдігі, істі талқылаудағы ашықтық, жариялылық және анықтық, процеске қатысушылардың жеке қауіпсіздігін қамтамасыз ету сияқты негізгі ұстанымдар қатаң сақталынады. Қазіргі таңда барлық мемлекеттік мекемелерде осы гендірлік саясатқа қатысты мәселеге аса көңіл бөлініп отыр. Сонымен қатар, мекемелерде мемлекеттік қызметкерлер арасында гендерлік саясатқа қатысты түрлі тақырыптарда дөңгелек үстелдер мен семинарлар жиі өткізіліп, теңдей дәрежеде қоғамның барлық саласында еңбек етуіне, білімін жетілдіріп, қызметте өсуіне негіз болып отыр. Бұны жалпы қоғамның жетістігі деп білгеніміз жөн.

Жалпы, әйелдердің құқын қор­ғау мәселесі тарих барысында қоғамдағы әйелдерге деген көзқарас, күш көрсету, құқығын таптау, ер адамға бағыныштылықта ұстау сияқты мәселелерге жауап ретінде көтерілгені мәлім. Біртіндеп әйелдердің проблемасын заң жолымен шешу тәжірибесі қалыптасты.

Бір қолымен бесікті, бір қолымен әлемді тербетіп, айналасын үйлестіріп, жарастырып отырған әйелдің өзіне тең дәрежеде, зор құрметпен қараған абзал. Алыс-жақын ағайынды, көрші-қолаңды тату ету арқылы қоғамның ынтымағын сақтауда, ұлағатты ұрпақ тәрбиелеуде әйелдің ерекше орнын білу – қазақта бұрыннан бар идеология. Тек осы құндылығымыздың құрып кетпеуіне жол бермеген жөн.

Сондықтан, гендерлік саясат – қоғамдық өмірдің барлық салаларында да ерлер мен әйелдердің теңдігіне қол жеткізуге бағытталған мемлекеттік және қо­ғамдық қызмет. Осыны ұғынып, әрқайсымыз Отан, отбасы алдындағы өз міндеттерімізді дұ­рыс атқарсақ, онда бұл тұрғыда ешқандай мәселе болмасы анық.

А.АБДЫКАМАЛОВ,
Қарағанды қаласының әкімшілік құқық бұзушылықтар жөніндегі
мамандандырылған ауданаралық сотының төрағасы.

Сообщение Әйел құқы тапталмауы тиіс появились сначала на «ORTALYQ QAZAQSTAN» газеті.