Деректерге сүйенсек, бүгінгі күні облыста ветеринариялық қызметті «вертикальді жүйе» форматында салаға жауапты басқарма бақылауымен 12 ветеринариялық станция және моноқалалардағы 6 бөлімше жүзеге асырады.

– Жоспарға сәйкес ауылдағы малдарға вакцина салынып, қаны алынады. Жасы 3-18 ай аралығындағы малдарға 3 ай сайын, ал, ересек малдарға 6 ай сайын вакцина егіледі. Тек эпизоотияға қарсы емес, сібір жарасы, дерматит ауруларына да шара қолданылады. Сонымен қатар, вакцина егілген сәтте біз оны бірден VetLab мониторинг пилоттық жобасына тіркейміз. Мал иесі сол жерден анықтама қағазын кез келген уақытта алады, – дейді Дубовка ауылының ветеринар маманы Ерлан ­Сыздықов.

Қазіргі таңда ішкі сауда объектілерінде (базарларда)­ VetLab мониторинг пилоттық жобасы бастау алған. Ішкі сауда объектісінде VetLab жүйесі арқылы берілген сараптама актісінен ет сатып алушы QR-код  арқылы бастапқы ақпаратты алады. Яғни, онда малдың сырға номері, өнім түрі, жынысы, туған жылы және мекені, иесі, сойылған жері, сараптама актісін берген ветеринариялық зертхананың аты көрсетілген ақпараттар бар.

– Біз ішкі сауда объектісіне келген ет өнімдерін қадағалаймыз. Яғни, ветеринарлық анықтама қағазды тексереміз. Ішкі сауда орындарындағы зертханаға жіберіп, жауапты басқарма бақылауы тексерісті оң деп санаса, сараптама актісі беріледі. Егер барлығы қалыпты болса, сатуға жібереміз, тұтынушы сатушыдан оны көрсетуді талап етуге құқылы. Барлық мәліметтер осы онлайн платформада көрсетілген. Біздің басты міндетіміз – ет сапасын бақылау, жарамдылығын тексеріп, қадағалау, – деді ветеринария басқармасының бас маманы Жасқанат ­Сейдахметов.

Ішкі сауда объектісінің басшыларына, жануардан алынатын өнімдерді сатушыларға, ветеринариялық зертхана мамандарына Қарағанды қалалық аумақтық ветеринариялық инспекция тарапынан облысымыздағы және рес­публикадағы эпизоотиялық ахуал туралы үнемі түсіндірме жұмыстары жүргізіліп, жадынамалар таратылып, Facebook желісіне жарияланып отыратынын атап өткен жөн.

Бүгінгі күні облыста 1 300 000-ден астам ірі қара, қой малын бруцеллезге қарсы зерттеу қарастырылған. 165 000 ірі қараға вакцина салынды, 860 сиырдан бруцеллез ауруы оң нәтиже анықталды және 15 қой-ешкіден жұқпалы індет табылды. Анықталған малдар санитарлық союға жатады, ол патологиялық өзгеріске ұшырамаса, ет өнімін сатуға рұқсат етіледі. Ал, негізі бұл малдар қайта өңдеуге өтеді, шұжық және басқа да тамақтар жасауға жіберіледі. Қайта өңдеу­ге жіберілсе, оның 30%-ын өтем­ақысы Үкімет тарапынан, қалған 70%-ын сол кәсіпорын береді. Жоспар бойынша барлық жұқпалы індеттерге қарсы іс-шаралар жүзеге асырылуда. Айта кететін жайт, еліміздің бірқатар аймағында су тасқынынан өлген малдардың еттері сатылуда деген ақпарат тараған еді. Елімізде жағдай тұрақты, ақпарат шындыққа сай келмейді. Жануарлардан алынатын шикізат пен өнімдер ветеринариялық-санитарлық сараптамасыз сатуға тыйым салынған. Облыс бойынша қазір ешқандай қауіп жоқ, жағдай тұрақты, бруцеллез анықталған елдімекендерде шектеу қойылған.

Сонымен, өңіріміздегі жұқпалы ауруға қарсы жұмыстар жүргізіліп жатыр. Ветеринариялық мамандар аймақтағы барлық малдарға шамамен бір ай көлемінде барлық төрт түлікке вакцина салуды көздеп отыр.

Әлішер СҮЛЕЙМЕНОВ,
Е.Бөкетов атындағы Қарағанды зерттеу университеті
филология факультетінің ІІ курс студенті

Сообщение Ет сапасы талапқа сай появились сначала на «ORTALYQ QAZAQSTAN» газеті.

Адам ағзасы сырттан келетін кері әсерлерге, ауруларға бойындағы дәрумендер жиынтығымен күшейген иммунитеті арқылы қарсы тұра алады. Адамдар қыстың қысқа күнінде аз қимылдайды да көктемде қимыл-қозғалыс көбейеді. Және ауа райының өзгерісі де денсаулыққа әсер етеді. Дәрумен қоры аз ағза осындай шақта әлсіздікке ұшырайды. Соның салдарынан сәл суыққа тез тұмауратып қалады. Тіпті, дәруменнің жетіспеушілігінен пайда болған денедегі әлсіздік созылмалы аурудың өршуіне де сеп болады.
Дәрумен жетіспеушілігі, әсіресе көктемде қатты байқалады. Қыстың қысқа күніндегі аз қимылға үйренген ағза күн ұзарған көктемдегі жылымық ауаның өзгерісіне бірден бойұсына алмай, әлсірейтін көрінеді. Егер осындай қара өзек шақта ағзадағы дәрумендер қорын толықтырып отырмаса, эндокринді жүйенің жұмысы нашарлап, созылмалы аурулардың өршу қаупі артады екен. Көптеген адамдарда иммундық жүйенің әлсіреуінен қан қысымы көтеріліп, бас ауырады. Бұл кездегі әлсіздікке көбіне орта жастан асқан кісілер тез шалдығады екен.
Ас қорыту жүйесі бұзылып, гастрит, панкреатит, холецистит, пиелонефрит сияқты аурулар асқынса да қан аздық пайда болады. Соның салдарынан ағза дәрумен тапшылығын сезініп, зардап шегеді. Дәрумен жетіспеушілігін бас айналып, көз қарауытып, бойды ұйқышылдықтың басуынан байқауға болады. Егер сізде осындай белгілер байқалса, ағзаңызда дәрумендер жетіспеушілігі деп біліңіз. Тез шаршап, жүйке жұқарып, ашушаңдық та осындай иммундық жүйенің әлсіздігінен болады. Сонымен қатар, шаш жиі түсіп, көздің көру мүмкіндігі нашарлайды. Тырнақтың реңкі өзгеріп, сызықтар мен дақтар пайда болады. Дененің терісі құрғап, тіпті қабыршақтанып кетуі де мүмкін. Мұндай шақта созылмалы ауруға шалдыққандардың ескі сырқаты қайта қозса, кей кісілер жаңадан ауру жұқтыруы да мүмкін. Ер адамдарға қарағанда дәрумендер жетіспеушілігіне көбіне әйелдер жиі душар болатын көрінеді.
Ал, дәрігерлер адам ағзасы дәрумендерді өте қажет ететін көктем мезгілінде сары май, жұмыртқа, балық, ет, сүт, ірімшікпен күнделікті тамақтанып тұру керегін ескертеді. Әсіресе, күнделікті ас мәзірінен көкөністердің түспегені жөн.

Сообщение Адамдар көктемде неліктен әлсірейді? появились сначала на «ORTALYQ QAZAQSTAN» газеті.

   Серіктестік ірі қара етін экспорттау әлеуетін арттыру бағдарламасына енгізілген. Кәсіпорын қой, сиыр, жылқы етінен «Халал» талаптары бойынша өнім өндіруге маманданған. Мұндағы технология желісі заманауи үлгіде жабдықталған. Кешен жылына 276 тонна сиыр етін, 200 тонна қой етін, 580 мың дана консерві және 20 тонна түрлі жартылай дайын өнімдер шығаруға қауқарлы. Экскурсия барысында фермерлер кәсіпорын басшылығымен әңгіме-дүкен құрып, ет экспорттау ісін өркендету бағытындағы ақыл-кеңестерге қанықты.

Нұрқанат ҚАНАФИН

Сообщение Ет экспортын арттыру жолында появились сначала на «ORTALYQ QAZAQSTAN» газеті.

Сиыр, жылқы етінен жасалған шұжық пен консервіде бұқтырылған ет өнімдерімен толыға түсті. Қазіргі кезде шұжықтың 1 келісі 1650 теңге болса, 340 грамдық консерві 500 теңгеге бағаланып отыр. Тауардың бұл түрлерін жасау үшін 3 млн. теңгеге жаңа қондырғылар сатылып алынған. Өнімнің бұл түрлері бүгінде цехқа қарасты дүкендерде сатылымға шығарылған. Бұл шаруаларды 20 адам атқаруда. Көршілес елді мекендерден бастап, Қарағанды қаласының дүкендерінде бар. Сонымен қатар, цех басшысы Өмірзақ Қапсаттаровтың айтуынша, Теректідегі кен байыту комбинатымен келісім-шарт жасалған. Ендігі уақытта «Балқантаудың» өнімдері «Алтайполиметалл» кәсіпорны жұмысшыларының ауқатына айналмақ.

Сағыныш ӘБІЛОВА

ҚАРҚАРАЛЫ ауданы.

Сообщение Кәсіпкерлік қанат жайып келеді появились сначала на «ORTALYQ QAZAQSTAN» газеті.